საქართველოს პარლამენტი საგაზაფხულო სესიაზე `გენდერული თანასწორობის შესახებ” კანონს მიიღებს. კანონის ინიცირება `ქალთა პოლიტიკურ რესურსცენტრს” ეკუთვნის, რომელმაც პარლამენტს 2004 წელს მიმართა, თუმცა ამ დრომდე, როგორც საზოგადოებრივ, ასევე საკანონმდებლო განხილვებს გადიოდა. არსებულ კანონპროექტს პარლამენტმა პირველი მოსმენით კენჭი უკვე უყარა. ახალი კანონი საერთაშორისო გამოცდილებასა და გაერო-ს `ქალთა მიმართ ყველა ფორმის ძალადობის აღმოფხვრის შესახებ” კონვენციის მთავარ დებულებებსა და პრინციპებს ეყრდნობა. კანონპროექტი განიხილეს და მოწონებით მიიღეს პარლამენტის საფინანსო-საბიუჯეტო და იურიდიულმა კომიტეტებმა.
კანონის განმარტებით ბარათში ნათქვამია. რომ მისი მზიანია: საზოგადოებრივი ცხოვრების ყველა სფეროში გენდერული თანასწორობის მიღწევა, სათანადო პირობების შექმნა, ქალისა და მამაკაცის თანასწორი უფლებებისა და შესაძლებლობების უზრუნველყოფა, სქესის ნიშნით ყოველგვარი დისკრიმინაციის თავიდან აცილება და აღმოფხვრა.
გენდერული თანასწორობის მისაღწევად სახელმწიფო შემდეგ ვალდებულებებს აიღებს: სამართლებრივი ბაზის სრულყოფა; ამ კუთხით მიმართული სპეციალური პროგრამებისა და ღონისძიებების შემუშავება და განხორციელება; სქესთა ნიშნით მოქალაქეთა დისკრიმინაციისკენ მიმართული ყველა სახის ინფორმაციის გავრცელებისგან საზოგადოების დაცვა; გენდერულ, სოციალურ სამართლიანობაზე ორიენტირებული ბიუჯეტის მხარდაჭერა, როგორც ცენტრალურ, ისე ადგილობრივ დონეზე.
ამასთან, კანონი ადგენს ქალისა და მამაკაცის კონსტიტუციით განსაზღვრულ თანასწორი უფლებების, თავისუფლებებისა და შესაძლებლობების უზრუნველყოფის ძირითად მიმართულებებსა და გარანტიებს, განსაზღვრავს მათი განხორცილებეის მექანიზმებს საზოგადოებრივი ცხოვრების ყველა სფეროში.
