დევნილი მოსახლეობისთვის საცხოვრებელი ფართების საკუთრებაში გადაცემის პროცესი გრძელდება. ლტოლვილთა და განსახლების მინისტრი კობა სუბელიანი დღეს ისანში, კაიშაურის #3-ში, ყოფილი მე-17 საბავშვო ბაღის შენობაში მცხოვრებ აფხაზეთიდან დევნილ მოსახლეობას შეხვდა. 11 დევნილი ოჯახი, რომელთაც ფართები საკუთრებაში გადაეცემათ, 16 წელია, აღნიშნულ შენობაში ცხოვრობს. მათი მთავარი პრობლემა, რომლის მოგვარების მიზნით ერთი თვის წინ სამინისტროს მიმართეს, აღნიშნული ფართების საკუთრებაში გადაცემა იყო.
როგორც დევნილებთან საუბრისას კობა სუბელიანმა აღნიშნა, ამ ფართის საკუთრებაში გადაცემის პრობლემა მოხსნილია და დაკანონების პროცესი მაქსიმუმ, ორ თვეში დასრულდება. მათ ელექტროენერგიის ინდივიდუალური მრიცხველებიც დაუმონტაჟდებათ, ამასთან, ორ დღეში შენობის გადახურვა დაიწყება. ამჟამად საქართველოს მასშტაბით რეაბილიტირებული და დაკანონებულია დევნილთა 400 ობიექტი. აღნიშნული პროცესი 500-მდე ობიექტში გრძელდება.
