აფხაზეთიდან დევნილმა მოსწავლეებმა დედაენის დღე აზერბაიჯანელ თანატოლებთან ერთად აღნიშნეს. როგორც "პირWელს" "აფხაზეთის მედიაცენტრიდან" აცნობეს, დედაენის დღესთან დაკავშირებით, აფხაზეთის განათლებისა და კულტურის მინისტრი დალი ხომერიკი აფხაზეთის საჯარო სკოლების მოსწავლეებთან ერთად ბოლნისის რაიონის სოფელ მამხუტის არაქართულენოვან საჯარო სკოლას ეწვია. აფხაზეთიდან დევნილმა, მათ შორის ეთნიკურად აფხაზმა ბავშვებმა და მათმა აზერბაიჯანელმა თანატოლებმა ერთობლივი ლიტერატურულ-მუსიკალური კომპოზიცია წარმოადგინეს და სპორტული შეჯიბრებები გამართეს, სკოლის ეზოში კი მეგობრობის სიმბოლოდ მარადმწვანე ხე დარგეს, რის შემდეგაც მამხუტის VI-VII საუკუნით დათარიღებული დარბაზული ტიპის ეკლესიისკენ ერთობლივი ლაშქრობა მოეწყო. ცნობისთვის, აღნიშნული ღონისძიება აფხაზეთის განათლებისა და კულტურის სამინისტროს პროექტის "სასკოლო პარტნიორობა" ფარგლებში ხორციელდება, რომლის მიზანს ქართული ენის პოპულარიზაცია, აფხაზი და აზერბაიჯანელი მოსწავლეების დამეგობრება, არაქართულენოვან ახალგაზრდებში ქართული ენის ცოდნის გაღრმავება და კონფლიქტის ზონაში ქართული ენის სწავლების პრობლემებთან დაკავშირებით მათი ინფორმირება წარმოადგენს.
