პარიზში ანა ტატიშვილი ეგრევე პრესტიჟულ კორტზე დააყენეს.
საქართველოს პირველი და მსოფლიოს 106-ე ნომერი თავიდანვე პოპულარულ ფრანგზე, მარიონ ბარტოლიზე გავიდა და რამდენიმე ათასი გულშემტკივრის წინ, პირველ კორტზე დადგა. საინტერესო ტესტი იყო. ტატიშვილი "როლან გაროზე" პირველად თამაშობდა ძირითადში, პირველად გავიდა პირველ კორტზე და პირველად მოუგო სეტი მსოფლიოს მეთერთმეტე ქალბატონს. ანამ წააგო და მაინც კარგი იყო. ტატიშვილმა სერიოზულ მოწინააღმდეგეს პირველ სეტში ბევრჯერ წაართვა მოწოდება და ბევრი ბრეიქით სეტი 6:1 მოიგო. ბოლო ორი სეტი ბარტოლიმ 6:2, 6:1 წაიღო. ბარტოლი უკეთესი იყო და ფრანგმა უნივერსალმა ლოგიკურადაც მოიგო.
ტატიშვილი მზარდი გოგონა, მშვენიერი საჩოგბურთო პროდუქტია. ანამ წელს წინა სეზონებზე უკეთ ითამაშა და პირველ ასეულს მიუახლოვდა. ნორმალური ჩოგბურთი უკანა ხაზიდან, აქტიური და გამოსასწორებელი კომპლექსური თამაში და მონდომება. ყველაფერი ჯამურად დალაგდა და ტატიშვილის ჩოგბურთიც დალაგდა. ბარტოლისთან პირველ სეტში ანამ არჩვეულებრივად, ლტოლვით ითამაშა, თითქმის ყველა ქულა მოიგო და ბარტოლის აგრესიაში აჯობა. პირველი სეტის ჩოგბურთი ანამ ვეღარ გაიყოლა და ბარტოლიმ კლასით მოიგო.
ფრანგი თითქმის სულ პირველ ათეულთან ტრიალებს. ბევრს იგებს, ცოტას არ აგებს, არასტაბილურია და ძალიან პოპულარული. ბარტოლი ოთხი წლის წინ უიმბლდონის ფინალში გავიდა და ერთეულებში (იმავე სეზონის 22 ოქტომბერს) მეცხრე იყო. ბარტოლი სულ სადღაც ცელქობს, აქტიურობს, უსახლაროებს დახმარებას უწევს, ყველასთვის ხასიათის გამოკეთებას ცდილობს. საფრანგეთშ მარიონი უფრო პოპულარულია, ვიდრე გაელ მონფილზი და ნაკლებად პოპულარული, ვიდრე ჟო-ვილფრედ ცონგა.
ანამ ბევრი შეცდომა დაუშვა. მთელი ტესტი ორ საათზე ნაკლებში ჩაეტია და ტატიშვილს ამ დროში 34 უნებლიე და 6 ორმაგი შეცდომა ჰქონდა. ტატიშვილისთვის სტანდარტული შედეგია, მაგრამ ბარტოლისთან ანა სხვა ჩოგბურთს ვერ ითამაშებდა. ბარტოლისთან ჩვენი გოგო აგრესორი უნდა ყოფილიყო და ბარტოლისთან ანამ პირველ სეტში შედევრი შექმნა. უბრალოდ, შემდეგ მონდომებულ მხატვარს ფუნჯი უფრო გამოცდილმა შემქნელმა წაართვა და ყველაფერი თავისებურად დაასრულა. ბარტოლიმ ბოლო ორ სეტში ძალიან კარგი, პირველი ათეულის წევრის, ფავორიტის ჩოგბურთი ითამაშა.
ანა ტატიშვილი წელს მეტს და უკეთ თამაშობს. ბარტოლიზე და სხვა მტაცებლებზე ქართველი იშვიათად გავა, რადგან სარეიტინგო ქულების აღებას ჩელენჯერებზე ეცდება და ჩელენჯერებზე ბარტოლი და იანინა ვიკმაიერი, ან ჯულია გიორგესი არ თამაშობენ. დაბალი ეშელონიდან ანა საკმარისი ქულების აღების შემთხვევაში, სერიოზულ, უმაღლესი კატეგორიის ტურნირებზე ყოველთვის კვალიფიკაციის გარეშე დაიშვება. კარგი იქნებოდა საფრანგეთის ღია პირველობის კარგად დაწყება და უკეთესი იქნება, თუ ბარტოლისთან წაგებით, ანა ბევრ რამეს აითვისებს. გამოსასწორებელი ბევრია და ტატიშვილს პროგრესის რეალური რესურსი აქვს. მარიონ ბარტოლისთან ანამ 17 გათამაშება აუღებელი დარტყმით დახურა და 1 ეისი გააკეთა. ბარტოლიმ შეხვედრა 5 ეისით, 22 ვინერით, 7 ორმაგი და 31 უნებლიე შეცდომით დაასრულა. ბარტოლისთვის ეს მეათე "როლან გარო" იყო და ტატიშვილი პარიზის გრუნტზე, ძირითადი ბადის მონაწილის სტატუსით პირველად გავიდა. ანას უკეთესი შეხვედრები უნდა ვნახოთ. აუცილებლად ვნახავთ. საფრანგეთის ღია პირველობა ქართველი გოგონასთვის დაიწყო და დასრულდა. სეზონი გრძელდება. სეზონმა ბევრი მოგება უნდა ჩაიტიოს.