წყარო: პორტალი GINSC
კატეგორია: ექსკლუზივი 
2011-08-02
28 ივლისს, მარნეულში, საქართველოს აზერბაიჯანელ ქალთა კავშირის ოფისში, გაიმართა ქალთა საინფორმაციო ცენტრისა და აზიის განვითარების ბანკის ერთობლივი პროექტის - “წყლის მოხმარების, სანიტარიისა და ჰიგიენის შესახებ საინფორმაციო-საგანმანათლებლო კამპანია მარნეულსა და მესტიაში” -პრეზენტაცია.
აღნიშნული პროექტის ფარგლებში შედგა თანამშრომლობა ქალთა საინფორმაციო ცენტრსა, საქართველოს აზერბაიჯანელ ქალთა კავშირსა და სოციალური კვლევისა და ანალიზის ინსტიტუტთან.
შეხვედრაზე, ქალთა საინფორმაციო ცენტრის წარმომადგენლებმა ისაუბრეს პროექტის მიზანზე და მის ფარგლებში ქალაქ მარნეულში დაგეგმილ აქტივობებზე. ასევე აღინიშნა რამდენად უნიკალურია პროექტი, რომელიც პირველად საქართველოში განიხილავს წყლის ოპტიმალურ მოხმარებას, ჰიგიენასა და სანიტარიას გენდერულ ჭრილში. მომხსენებლემა აღნიშნეს რომ პროექტის სამიზნე ჯგუფს, წარმოადგენენ ქალები, რომლებიც ოჯახში წყლის ძირითადი მომხმარებლები არიან და უშუალო კავშირი აქვთ ოჯახში სანიტარიისა და ჰიგიენის დაცვასთან და აქედან გამომდინარე, სწორედ ქალებზეა დამოკიდებული თუ რამდენად ეფექტურად, რაციონალურად და უსაფრთხოდ მოხდება წყლის გამოყენება.
აღნიშნულ შეხვედრაზე, სოციალური კვლევისა და ანალიზის ინსტიტუტის ექსპერტ-ანალიტიკოსმა, თეონა მატარაძემ, გააკეთა კვლევის - ”საქართველოში ურბანული წყლისა და კანალიზაციის სისტემის განვითარების სტრატეგიის” შედეგების პრეზენტაცია. თეონა მატარაძემ აღნიშნა რომ კვლევა ჩატარდა საქართველოს 7 პატარა ქალაქში, მათ შორის მარნეულშიც, რომლის ფარგლებშიც გამოიკითხა 2000 ადამიანი. კვლევის მიზანს წარმოადგენდა განსაზღვრა იმისა თუ საიდან იღებდა მოსახლეობა წყლის რესურს, რა ტიპის საკანალიზაციო სისტემით სარგებლობდა, რამდენი დრო და ფინანსები ეხარჯებოდათ მათ წყლის მომარაგებაში და რა გავლენას ახდენდა ჯანმრთელობისთვის საშიში წყალი მოსახლეობის ჯანმრთელობაზე. აღსანიშნავია ის ფაქტი რომ კვლევაში გათვალისწინებული იყო გენდერული ასპექტები და გამოვლენილი იყო ქალების პრობლემები, რომელიც დაკავშირებულია წყლის არარეგულარულ მიწოდებასთან და ოჯახში სანიტარიისა და ჰიგიენის ნორმების დაცვასთან.
შეხვედრის ბოლოს გაიმართა დისკუსია, სადაც აღინიშნა რომ წყალთან, სანიტარიასთან და ჰიგიენასთან დაკავშირებული პრობლემები საკმაოდ აქტუალურია ქალაქში და გამოითქვა რეკომენდაციები, რომელიც გათვალისწინებილი იქნება მარნეულში საინფორმაციო-საგანმანათლებლო კამპანიის წარმოების დროს.
შეხვედრას ესწრებოდნენ ადგილობრივი წყლის კომპანიებისა და მარნეულის მუნიციპალიტეტის საკრებულოს წარმომადგენლები, ასევე, არასამთავრობო ორგანიზაციები და ჟურნალისტები. |
