საქა-რთველო ძირითად ბადეშია, გეორ-გია კვალიფიკაციის ფავორიტია
საინფორმაციო სააგენტო "მსოფლიო სპორტი" კატეგორია:სპორტი 2011-08-03
ბოლოდროინდელი წარუმატებელი ასპარეზობის გამო, პლიაჟის ფრენბურთის ქართული წყვილები საქა-რთველო და გეორ-გია მსოფლიო ტურის მორიგ ეტაპში, რომელიც დიდი სლემის ეგიდით ავსტრიის ქალაქ კლაგენფურტში იმართება, საკვალიფიკაციო ეტაპიდან ჩაებნენ.
პირველად, საქმეში ქალთა დუეტი საქა-რთველო (კრისტინ სანტანა-ანდრეცა ჩაგაში) ჩაერთო და ძირითადი ბადის საგზურიც მოიპოვა. მესამე ნომრად განთესილმა ბრაზილიელმა ქართველებმა ავსტრიულ წყვილს (ტეუფლი-კლოპფი, 30-ე) 2:0 (21:18, 21:14) სძლიეს, შემდეგ კი იაპონელებსაც (ურატა-ტაკე, მე-19) სეტისწაუგებლად მოუგეს – 2:0 (21:14, 21:11).
ძირითად რაუნდში საქა-რთველო 30-ე განთესვით ითამაშებს და C ჯგუფში მისი მეტოქეები ბრაზილიური (ტალიტა-ანტონელი, მე-3), ჩეხური (კოლოჩოვა-სლუკოვა, მე-14) და ამერიკული (ფენდრიკი-ჰანსონი, მე-19) წყვილები იქნებიან. ფლეი ოფში რვა ჯგუფის სამ-სამი მოწინავე გააღწევს, საქა-რთველოს კი ყველა მატჩის წაგების შემთხვევაშიც, 80 სარეიტინგო ქულა განაღდებული აქვს.
ვაჟთა ტურნირის ძირითად ბადეში მოსახვედრად ერთადერთი შეხვედრის მოგება მართებს გეორ-გიას, რომელიც კვალიფიკაციაში პირველ ნომრადაა განთესილი და საწყის რაუნდში ისვენებს, მეორე წრეში კი ავსტრალიურ (ბოემი-კაპა, მე-17) და კანადურ (რედმანი-სექსტონი, მე-16) დუეტებს შორის უმჯობესს გაეჯიბრება.
შეგახსენებთ, რომ გეორ-გიას ღირსებას ასევე ბრაზილიელები ჟორჟ ტერშეირო და რენატო გომეში იცავენ.
