თაილეინ ლოუბრი ბლონდუ 10 წლის მოდელია. ის ჟან-პოლ გოტიემ 5 წლის ასაკში აღმოაჩინა და მას შემდეგ გოგონას ცხოვრება ძირფესვიანად შეიცვალა. ის ნამდვილი ვარსკვლავი გახდა. სულ ცოტა ხნის წინ თაილეინის ფოტო ჟურნალ "ვოგის" გარეკანზე დაიბეჭდა, რასაც აშშ-ში დიდი დებატები მოჰყვა.
ფოტოზე ბლონდუს მაღალქუსლიანი ფეხსაცმელები და ქალური კაბა აცვია, სახე კი მაკიაჟით მთლიანად აქვს დაფარული. აშშ-ის ფსიქოლოგების ასოციაციის დირექტორის - შერი მაილზ-კოენის თქმით, გოგონას ასეთი მიზნებისთვის გამოყენება არა მხოლოდ მის ფსიქიკას აზიანებს, არამედ მის მნახველ გოგონებსაც საკუთარი თავის მიმართ არაჯანსაღ დამოკიდებულებას უღვივებს, რაც შემდგომ მათში საკმაოდ მძიმე დაავადებებს იწვევს.
ფსიქოლოგების თქმით, გოგონებისთვის ასეთი სარეკლამო პლაკატის ხილვის შემდეგ ღირებულებათა სისტემა გარეგნული მონაცემების აღქმამდე ქვეითდება. მათთვის მთავარი ხდება, როგორ გამოიყურებიან. ასევე დიდია ადრეულ ასაკში სექსუალიზაციის საფრთხე.
"ეს საშინელებაა, არ მინდა 10 წლის ბავშვის ასეთ ფორმაში დანახვა!", - დაწერა საიტ Feminsting.com-ის რედაქტორმა ქლოია ენგიალმა.
მრავალი ადამიანის აზრით, ეს უბრალოდ ბავშვის მონაწილეობით გადაღებული პორნოგრაფიაა.
"ვოგის" წარმომადგენლებს ამ საკითხზე ჯერჯერობით კომენტარი არ გაუკეთებიათ.
