წყარო: პორტალი GINSC
კატეგორია: ექსკლუზივი 
2011-08-31
17 აგვისტოს, მესტიის სათემო რესურს-ცენტრის ოფისში, გაიმართა ქალთა საინფორმაციო ცენტრისა და აზიის განვითარების ბანკის ერთობლივი პროექტის - ,,წყლის მოხმარების, სანიტარიისა და ჰიგიენის შესახებ საინფორმაციო-საგანმანათლებლო კამპანია მარნეულსა და მესტიაში” - პრეზენტაცია.
შეხვედრაზე ქალთა საინფორმაციო ცენტრის წარმომადგენლებმა ისაუბრეს პროექტის მიზანებისა და ქალაქ მესტიაში დაგეგმილ აქტივობების შესახებ. აღინიშნა რომ პროექტის ფარგლებში, საქართველოში, პირველად განიხილება წყლის ოპტიმალურ მოხმარება, ჰიგიენა და სანიტარია გენდერულ ჭრილში. პროექტის სამიზნე ჯგუფს წარმოადგენენ ქალები, რომლებიც წყლის ძირითადი მომხმარებლები არიან და უშუალო კავშირი აქვთ ოჯახში სანიტარიისა და ჰიგიენის დაცვასთან. აქედან გამომდინარე, სწორედ ქალებზეა დამოკიდებული თუ რამდენად ეფექტურად, რაციონალურად და უსაფრთხოდ მოხდება წყლის გამოყენება.
აღნიშნულ შეხვედრაზე, ასევე, შედგა არასამთავრობო ორგანიზაცია ,,სოციალური კვლევისა და ანალიზის ინსტიტუტის” მიერ ჩატარებული კვლევის - ,,საქართველოში ურბანული წყლისა და კანალიზაციის სისტემის განვითარების სტრატეგიის” შედეგების გაცნობა. კვლევა ჩატარდა საქართველოს შვიდ პატარა ქალაქში, მათ შორის, მესტიაშიც, რომლის ფარგლებშიც გამოიკითხა 2000 ადამიანი.
კვლევის მიზანს წარმოადგენდა მოსახლეობის მიერ წყლის რესურსის მიღების, საკანალიზაციო სისტემის ტიპის, ასევე, წყლის მომარაგებისთვის დროისა და ფინანსების დანახარჯის განსაზღვრა და მოსახლეობის ჯანმრთელობაზე დაბინძურებული წყლის საშიში ზემოქმედება.
აღსანიშნავია ის ფაქტი, რომ კვლევაში გათვალისწინებული იყო გენდერული ასპექტები და გამოვლენილი იყო ქალების პრობლემები, რაც უკავშირდება წყლის არარეგულარულ მიწოდებას და ოჯახში სანიტარიისა და ჰიგიენის ნორმების დაცვას.
შეხვედრის ბოლოს გაიმართა დისკუსია, სადაც აღინიშნა წყალთან, სანიტარიასთან და ჰიგიენასთან დაკავშირებული პრობლემების აქტუალურობა. შემუშავდა რეკომენდაციები, რომელიც გათვალისწინებული იქნება მესტიაში საინფორმაციო-საგანმანათლებლო კამპანიის წარმოების დროს.
|
 |
