წყარო: პორტალი GINSC
კატეგორია: ექსკლუზივი 
2011-09-05
თბილისში, 2011 წლის 2 სექტემბერს, გაიმართა ღონისძიება, რომლის მიზანს წარმოადგენდა ისეთი საკითხების განხილვა, რომელიც ეხება გენდერული თანასწორობის ეროვნული სამოქმედო გეგმის განხორციელების მექანიზმების გაძლიერებას.
შეხვედრის ორგანიზატორი გახლდათ საქართველოს პარლამენტის გენდერული თანასწორობის საბჭო და აზიის განვითარების ბანკი.
ღონისძიებაზე სიტყვით გამოვიდა საქართველოს პარლამენტის გენდერული თანასწორობის საბჭოს თვამჯდომარე, პარლამენტის თავმჯდომარის მოადგილე, ეროვნული სამოქმედო გეგმისა და გენდერული თანასწორობის შესახებ კანონის მთავარი ლობისტი, ქ–ნი რუსუდან კერვალიშვილი.
შეხვედრის დროს წარმოდგენილ იქნა სხვადასხვა პრეზენტაცია, რომლის თემებს წარმოადგენდა: გენდერული თანასწორობის უზრუნველსაყოფად განსახორციელებელი 2011–2013 წლების ეროვნული სამოქმედო გეგმა და არსებული მექანიზმები ეროვნული გეგმის გახორციელებაში; გენდერული ბიუჯეტირება და გენდერული მეინსტრიმინგი ეკონომიკურ პოლიტიკაში; გენცდერული სტატისტიკა– საქსტატის შეფასება. ღონისძიების დროს მონაწილეებს შორის გაიმართა დისკუსია გენდერული თანასწორობის ეროვნული სამოქმედო გეგმის განხორციელებაში არსებული სირთულეებისა და მათი დაძლევის გზების შესახებ.
შეხვედრის წარმომადგენლები მივიდნენ იმ დასკვნამდე, რომ გენდერული თანასწორობის სახელმწიფო პოლიტიკის განხორციელების, გენდერული ასპექტების განათლების სფეროში შეტანისა და გენდერული თანასწორობის საკითხებზე მოსახლეობის ცნობიერების ამაღლების ხელშეწყობა, ეკონომიკის სფეროში ქალისა და მამაკაცის სრული და თანაბარი მონაწილეობის წახალისება, გენდერული სტატისტიკის სრულყოფა, გადაწყვეტილების მიღების ყველა დონეზე ქალისა და მამაკაცის სრული და თანაბარი მონაწილეობისა და სამშვიდობო პროცესებში ქალთა მონაწილეობის ხელშეწყობა, ჯანმრთელობისა და სოციალური დაცვის სფეროებში გენდერული ასპექტების გათვალისწინება, გარემოს დაცვის საკითხებზე გადაწყვეტილების მიღების ყველა დონეზე ქალისა და მამაკაცის თანაბარი მონაწილეობის ხელშეწყობა, წარმოადგენს იმ მნიშვნელოვან ნაბიჯებს, რომლის განხორციელება აუცილებელია ქვეყანაში გენდერული თანასწორობის მისაღწევად.
შეხვედრის მონაწილეები იყვნენ საქართველოს პარლამენტის გენდერული თანასწორობის საბჭოს, აზიის განვითარების ბანკისა და იმ არასამთავრობო ორგანიზაციების წარმომადგენლები, რომელნიც მუშაობენ გენდერული თანასწორობისა და ქალთა უფლებების დაცვის სფეროში. |
