ახალგორიდან და ცხივალის რეგიონიდან დევნილი ბავშვების ანსამბლმა მსოფლიო საერთაშორისო ფესტივალზე უმაღლესი ჯილდო მიიღო. გამარჯვებულ დევნილ ბავშვთა ანსამბლი „ქორული“ ფესტივალიდან დღეს დაბრუნდა. მათ წეროვანში საზეიმო დახვედრა მოუწყვეს. დევნილ ბავშვებს წეროვანში ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის მოადგილე ანდრო ჭულუხაძე დახვდა და გამარჯვება მიულოცა. ორკვირიანი ტურნეს ფარგლებში ანსამბლმა უნგრეთსა და სერბეთში 18 კონცერტი გამართა. ბავშვები ფესტივალზე ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს მხარდაჭერით იმყოფებოდნენ. ანსამბლი 2 წლის წინ წეროვანის დევნილთა დასახლებაში შეიქმნა. ფესტივალზე დევნილი ბავშვების ჯგუფს რატი ტვილდიანი ხელმძღვანელობდა.
როგორც დევნილმა ბავშვებმა აღნიშნეს, ეს მათი პირველი საერთაშორისო კონკურსი იყო და ძალიან ბედნიერები არიან - „ძალიან წარმატებული კონცერტები გვქონდა. ხალხი ყველგან ოვაციებით გვხვდებოდა, ჩვენი გამოსვლა ყველას მოეწონა. მინისტრი რომ არ დაგვხმარებოდა ამ ფესტივალზე ვერც წავიდოდით. აღფრთოვანებული ვარ და საუბარიც მიჭირს. ეს ჩვენი პირველი გამარჯვებაა და იმედი მაქვს სამინისტროს და ჩვენ ოჯახებს კიდევ ბევრჯერ გავახარებთ“, - აღნიშნა დევნილმა ლაშა მწითურმა.
