ამერიკის შეერთებული შტატების სახელმწიფო მდივანი ჰილარი კლინტონი საქართველოს ლიდერებს მოუწოდებს, კონკურენტუნარიანი საარჩევნო კამპანიის ჩატარება უზრუნველყონ.
ამის შესახებ ჰილარი კლინტონმა ბათუმში, სასტუმრო "რედისონში", აშშ-საქართველოს სტატეგიული ქარტიის პლენარულ სხდომაზე სიტყვით გამოსვლისას განაცხადა.
მისი თქმით, როგორც საპარლამენტო, ისე საპრეზიდენტო არჩევნები მნიშვნელოვანი იქნება იმისთვის, რომ საქართველოში გაღრმავდეს დემოკრატია. ჰილარი კლინტონის განცხადებით, არჩევნები სამართლიანად უნდა ჩატარდეს და სამართლიანი უნდა იყოს არა მარტო არჩევნების დღე, არამედ არჩევნების წინა პერიოდიც. სახელმწიფო მდივნის თქმით, უფრო მეტი ქალი უნდა ჩაერთოს პოლიტიკაში.
"მიუხედავად იმისა, რომ "ვარდების რევოლუციით" შექმენით დემოკრატია, უფრო რთული სამუშაოს გაწევა მოგიწევთ. არჩევნების შემდეგაც უნდა გაძლიერდეს დემოკრატია, განსაკუთრებული ყურადღება უნდა დაეთმოს შრომის უფლებებს, სასამართლო რეფორმას, მედიის თავისუფლებას", - განაცხადა ჰილარი კლინტონმა.
მისი თქმით, საქართველომ დემოკრატიის გაძლიერების კუთხით მნიშვნელოვანი ნაბიჯები გადადგა 2003 წლის "ვარდების რევოლუციის" შემდეგ და ეს ყველამ დააფასა. თუმცა მისი თქმით, ახლა საქართველოზეა დამოკიდებული, რომ დემოკრატიული ღირებულების კონსოლიდაცია მოხდეს.
