გაეროს გენერალურმა მდივანმა ადამიანებით ვაჭრობის მსხვერპლთა მიზნობრივი ფონდის დირექტორთა საბჭოს ხუთი წევრი სამწლიანი ვადით დანიშნა. მათ შორისაა საქართველოს წარმომადგენელი - ქეთევან ხუციშვილი.
გაეროს ნარკოტიკებისა და დამნაშავეობის სამმართველოს აღმასრულებელი დირექტორი იური ფედოტოვი ადამიანებით ვაჭრობის მსხვერპლთა მიზნობრივი ფონდის სამეურვეო საბჭოს წევრების დანიშვნას მიესალმა.
”მივესალმები დირექტორთა საბჭოში ამ ცნობილ მოღვაწეთა დანიშვნას. მათი გამოცდილება და კომპეტენცია თანამედროვე მონობის წინააღმდეგ ბრძოლაში ჩვენს ძალისხმევას მხარს დაუჭერს და ადამიანებით ვაჭრობის მსხვერპლთათვის, განსაკუთრებით ქალებისა და ბავშვებისათვის, ჰუმანიტარული, იურიდიული და ფინანსური დახმარების გაწევაში დაგვეხმარება”, - განაცხადა იური ფედოტოვმა.
მიზნობრივი ფონდი გაეროს გენერალურმა ასამბლეამ 2010 წლის ივლისში დააარსა იმ ორგანიზაციათა მხარდასაჭერად, რომლებიც ადამიანებით ვაჭრობის მსხვერპლთა დასახმარებლად მუშაობენ. ფონდი მხოლოდ მთავრობათა, კერძო მეწარმეთა და პირთა ნებაყოფლობითი შენატანებით ფინანსდება. იგი გაეროს ნარკოტიკებისა და დამნაშავეობის სამმართველოს ეგიდით მუშაობს, სამეურვეო საბჭო კი უზრუნველყოფს სტრატეგიულ ხელმძღვანელობას, კონსულტაციას უწევს მიზნობრივ ფონდს და იძლევა რეკომენდაციებს დაფინანსებისთვის წარდგენილი პროექტების თაობაზე.
