ერგნეთში ინციდენტების პრევენციისა და მათზე რეაგირების მექანიზმის (IPRM) რიგით 67-ე შეხვედრა გაიმართა. სახელმწიფო უსაფრთხოების სამსახურის ინფორმაციით, ცენტრალური ხელისუფლების წარმომადგენლებმა ოკუპაციის ხაზის მიმდებარე ტერიტორიებზე უკანონოდ აღმართულ მავთულხლართებსა და ე.წ. “საზღვრის აღმნიშვნელი” ბანერებით შექმნილ ვითარებაზე ისაუბრეს.
საუბარი ასევე შეეხო, ე.წ. საზღვრის უკანონო კვეთის ბრალდებით საქართველოს მოქალაქეების დაკავებების ფაქტებს. უწყების ინფორმაციითვე, ცენტრალური ხელისუფლების წარმომადგენლებმა მკაცრად დაგმეს საოკუპაციო ძალების ქმედებები და აღნიშნულის შესახებ დეტალური ინფორმაცხია მიაწოდეს შეხვედრეის მონაწილეებს.
ქართულმა მხარემ კიდევ ერთხელ ისაუბრა 28 ივნისს გაუჩინარებული ნიკა საღირაშვილის შესახებ, რომლის თაობაზეც ევროკავშირის სადამკვირვებლო მისიის ”ცხელი ხაზი” რამდენჯერმე იყო გააქტიურებული. აღნიშნულიდან გამომდინარე, ქართულმა მხარემ საოკუპაციო ზოლთან საოკუპაციო ძალების მიერ დამონტაჟებული ვიდეოკამერის ჩანაწერის შესახებ ინფორმაცია მოითხოვა და საოკუპაციო რეჟიმის წარმომადგენლებისგან მიიღო დაპირება, რომ უახლოეს დღეებში მონაცემებს მიაწვდიან.
შეხვედრაზე სოფ. ხეითში ბონდო გოჩაშვილის საფლავის დარბევის ფაქტზე კიდევ ერთხელ იმსჯელეს, სადაც ოსურმა მხარემ დარბევის ფაქტი არ დაადასტურა. აღნიშნულ საკითხზე მუშაობა წითელი ჯვრის საერთაშორისო საზოგადოების დახმარებით გრძელდება, რომელსაც ცხინვალის რეგიონში მანდატი აქვს.
სახელმწიფო უსაფრთხოების სამსახურის ინფორმაციით, რიგით 67-ე შეხვედრაზე საეჭვო ვითარებაში გარდაცვლილი დავით ბაშარულის საკითხიც განიხილეს, რომელზე მუშაობაც მათი თქმით, სამომავლოდაც გაგრძელდება.
