კატეგორია: ექსკლუზივი 2017-10-24
დღეს პარლამენტის გენდერული თანასწორობის საბჭოს სხდომა გაიმართა, რომელიც პარლამენტის პირველმა ვიცე-სპიკერმა და საბჭოს თავმჯდომარემ თამარ ჩუგოშვილმა გახსნა.
სხდომაზე წარმოდგენილი იყო სამაგიდო კვლევა – გენდერული თანასწორობა საქართველოში: ბარიერები და რეკომენდაციები.
კვლევაში იდენტიფიცირებულია ხარვეზები მთელ რიგ სფეროებში, როგორიცაა: პოლიტიკური მონაწილეობა, ეკონომიკური გაძლიერება, ქალთა მიმართ ძალადობა, შრომითი ურთიერთობები, ჯანმრთელობა, განათლება, მშვიდობა და უსაფრთხოება, სპორტი და კულტურა.
კვლევა ეყრდნობა უწყებათაშორისი ორგანოების, საერთაშორისო და ადგილობრივი არასამთავრობო ორგანიზაციების ანგარიშებსა და კვლევებს, აგრეთვე ინტერვიუებს სახელმწიფო ორგანოების წარმომადგენლებთან.
დოკუმენტი შეიცავს რეკომენდაციებს, რომელიც უნდა იყოს გათვალისწინებული კანონმდებლობების გადახედვის პროცესში ზემოთხსენებულ სფეროებში. შემუშავდა იმ მიზნით, რომ ხაზი გაესვას იმ დებულებებს, რომელიც ჯერ კიდევ საჭიროებს ცვლილებას გენდერული თანასწორობის პოლიტიკისა და პრიორიტეტების ჩამოყალიბებაზე პასუხისმგებელი პირების მუშაობისათვის ხელშეწყობის მიზნით.
ასევე გენდერული თანასწორობის საბჭოს სხდომაზე განიხილეს პარლამენტის წევრების ხათუნა გოგორიშვილის და სალომე სამადაშვილის განცხადებები, რომელიც მათ მიმართ გამოთქმულ სექსისტურ გამონათქვამებს შეეხებოდა.
საბჭოს წევრთა განცხადებით, ეს არ უნდა იყოს მისაღები სტანდარტი.
როგორც საბჭოს სხდომაზე პარლამენტის პირველმა ვიცე-სპიკერმა, თამარ ჩუგოშვილმა განაცხადა, აღნიშნული ფაქტები "ეთიკის კოდექსის" დროული მიღების საჭიროებაზე მიუთითებს.
"პარლამენტის ყველა წევრმა ეთიკის სტანდარტები საკუთარ თავს უნდა დავუწესოთ. "ეთიკის კოდექსის" მიღება დროულად უნდა მოხდეს. კარგია, რომ დეპუტატებმა რეაგირებისთვის მოგვმართეს", - აღნიშნა ჩუგოშვილმა.
საქმე ეხება თავდაცვის კომიტეტისა და ბიუროს სხდომებზე პოლიტიკური დებატებისას დაპირისპირებას, სადაც გია ვოლსკიმ სამადაშვილს "გოგო" უწოდა, ხოლო ზარდიაშვილმა გოგორიშვილს მიმართა - "ქ-ნო ხათუნა, პირი დაკეტეთ".
სხდომას ესწრებოდნენ სობჭოს წევრები, სახელმწიფო, არასამთავრობო და საერთაშორისო ორგანიზაციების წარმომადგენლები.
|