კატეგორია: გენდერული ძალადობა 
2017-12-14
სელმა ჰაიეკმა New York Times-ში წერილი გამოაქვეყნა, რომელშიც
ცნობილი პროდიუსერის ჰარვი ვაინშტეინის მხრიდან სექსუალურ შევიწროებაზე წერს.
სელმა ჰაიეკის თქმით, პროდიუსერმა მისი შევიწროება
2002 წელს დაიწყო, როდესაც მას ფილმ "ფრიდაში" იღებდნენ.
მსახიობმა განაცხადა, რომ "ჰარვი ვაინშტეინი მრავალი
წლის განმავლობაში მისი მონსტრი იყო."
"ჰარვი ვაინშტეინი იყო კინომანი, რისკიანი ადამიანი,
კინოს მფარველი, მოსიყვარულე მამა და მონსტრი. მრავალი წლის განმავლობაში ის ჩემი
მონსტრიც იყო ", - წერს ჰაიეკი.
მსახიობის თქმით, მას მრავალჯერ მოუხდა უარის თქმა
პროდიუსერის შეთავაზებაზე ერთად შხაპის მიღების, მასაჟის და სექსის შესახებ. გარდა
ამისა, ბრალდების მიხედვით, ვაინშტეინი მას მოკვლითაც დაემუქრა.
გარდა ამისა, ვაინშტეინმა ჰაიეკს სხვა ქალთან
სექსუალურ სცენაში გადაღება მოსთხოვა, რის გამოც მსახიობს ნერვული შეტევა დაემართა.
ჰაიეკის თქმით, მდგომარეობიდან გამოსვლაში მას ედუარდ ნორტონი, ანტონიო ბანდერასი
და ეშლი ჯადი დაეხმარნენ.
ჰარვი ვაინშტეინი ჰოლივუდის ვარსკვლავის სექსუალურ
შევიწროებს უარყოფს. ამის შესახებ ოფიციალური განცხადება მისმა წარმომადგენელმა
გააკეთა. აღნიშნულ ინფორმაციას deadline-ი ავრცელებს.
"ყველა სექსუალური ბრალდება, რომლებიც სელმამ
დაასახელა სიმართლეს არ შეეფერება, ადამიანები კი, რომლებიც ამ მოვლენების მოწმეები
იყვნენ, განსხვავებულ ინფორმაციას ავრცელებენ. ვაინშტეინი სელმას როგორც უმაღლესი
რანგის მსახიობს ისე მიიჩნევს, ამიტომ გადაიღო რამდენიმე ფილმში და მას ძალიან
გაუხარდა, როდესაც სელმამ ფილმისთვის "ფრიდა"საუკეთესო მსახიობის ტიტული მოიპოვა.
ამ როლით ჯენიფერ ლოპესიც იყო დაინტერესებული, თუმცა, ჰარვიმ ყველაფერი გააკეთა,
რომ სელმა აეყვანათ,"- ნათქვამია განცხადებაში.
ოქტომბერში ცნობილი გახდა, რომ ვაინშტეინის
სექსუალურ შევიწროებაში ადანაშაულებენ. სკანდალური საქმის შესახებ მასალები თითქმის
ერთდროულად გამოაქვეყნა ორმა წამყვანმა ამერიკულმა გამოცემამ - The New York
Times-მა და The New Yorker-მა.
|
