კატეგორია: სპორტი 2018-05-30
დიდი სლემის ტურნირების 23-ე გზის ჩემპიონი სერენა
უილიამსი პირველად კორტზე საფრანგეთის ღია პირველობის სასტარტო ეტაპზე გავიდა და
ჩეხ კრისტინა პლიშკოვას 7:6 (7:4), 6:4 სძლია. წლეულს ეს იყო მისი პირველი მოგება
გრუნტის კორტზე.
სადღეისოდ რეიტინგში 451 (?!) ადგილზე მყოფმა
უილიამსმა კლასიფიკაციაში 70–ე პოზიციაზე მყოფი პლიშკოვა საათსა და 46 წუთში
დაამარცხა. ეს ამ მეტოქეების პირისპირ პირველი შეხვედრა გახლდათ. როლან გაროსის
მეორე წრეში უილიამსი მეჩვიდმეტე ნომრად განთესილ ავსტრალიელ ეშლი ბარტის
დაუპირისპირდება.
ამერიკელი ჩოგბურთელი კორტზე უჩვეულო კოსტუმით
გამოვიდა. მოგების შემდეგ სერენამ განაცხადა, რომ მას ყოველთვის სურდა
სუპერგმირი ყოფილიყო და როლან გაროსის ტურნირზე შეძლო ამის განხორციელება, როცა
კატის კოსტუმში გამოვიდა კორტზე.
მან ასევე განაცხადა, რომ ამ კოსტუმს ყველა
ქალს უძღვნის, რომლებსაც სირთულეების დაძლევა მოუწიათ მშობიარობის შემდეგ, რათა
"დაბრუნდნენ და უშიშარნი იყვნენ".
"მე ამ კოსტუმს "catsuit"–ს (კატის კოსტუმი)
ვუწოდებ, რომელიც შთაგონებულია ვაკანდით (გამოგონილი ქვეყანა ფილმში "შავი
პანტერა"). თავს ვგრძნობ, როგორც მეომარი დედოფალი ვაკანდიდან,“– განაცხადა
უილიამსმა.
შეგახსენებთ, რომ 2017 წელს სერენა უილიამსს გოგო
შეეძინა, რის გამოც მან ერთი სეზონი გამოტოვა.
ბავშვის გაჩენის შემდეგ მან განაცხადა, რომ
ყოველთვის სურდა გოგონა ყოლოდა. "მხოლოდ ქალს შეუძლია იყოს საკმარისად ძლიერი
ყველაფრისთვის",– ამბობდა ჩოგბურთელი.
|