პერუს უფლებადამცველები აღშფოთებულები არიან პრეზიდენტის რეაქციით, რომელიც მან ყოფილი პარტნიორის მიერ ქალის მკვლელობაზე გამოხატა.
თავდამსხმელმა ქალს ბენზინი გადაასხა და ცეცხლი წაუკიდა. მსხვერპლის ოჯახის განცხადებით კაცი ორი წლის განმავლობაში აშანტაჟებდა ქალს და მიუხედავად მისი ჩივილისა, პოლიცია ამ ფაქტების იგნორირებას ახდენდა. ეივი აგრედა ძლიერი დამწვრობის შედეგად საავადმყოფოში გარდაიცვალა.
პერუს პრეზიდენტმა მარტინ ვიზარამ გამოხატა მწუხარება მომხდართან დაკავშირებით და მოითხოვა მოძალადის უმკაცრესი დასჯა, თუმცა, შემდეგ, თავისი განცხადებით, რომ „ზოგჯერ ცხოვრებაში ასეც ხდება და ჩვენ ეს უნდა მივიღოთ“, - გამოიწვია საზოგადოების დიდი აღშფოთება.
უფლებადამცველების განცხადებით პრეზიდენტმა ამ სიტყვებით წაახალისა მოძალადეები, რაც კიდევ უფრო გაზრდის ქალთა მიმართ ძალადობისა და გაუპატიურების შემთხვევების სტატისტიკას ქვეყანაში. იუსტიციის სამინისტროს მონაცემებით, პერუს პატიმრების თითქმის 20% სექსუალური დანაშაულის გამო იხდის სასჯელს, განსაკუთრებით კი არასრულწლოვანთა მიმართ სექსუალური ძალადობის გამო.
სტატისტიკის მიხედვით, 2018 წლის ოთხი თვის მანძილზე, ქვეყანაში ფემიციდის 43 შემთხვევა და ქალთა მკვლელობის მცდელობის 103 შემთხვევა იყო დაფიქსირებული, რაც გასული წლის ანალოგიურ პერიოდთან შედარებით 26.4% -ით მეტია.
