კატეგორია: გენდერული ძალადობა 
2018-08-03
საფრანგეთის პარლამენტმა ქუჩაში სექსუალური შევიწროვება დანაშაულად ჩათვალა. ამის შესახებ Reuters–ი იტყობინება.
კანონის გამკაცრების ინიციატორი საფრანგეთის პრეზიდენტი, ემანუელ მაკრონია.
კანონპროექტის ერთ-ერთი ყველაზე სადავო პუნქტი ქუჩაში სექსუალურ შევიწროვებაში ბრალდებულთა დანაშაულის ადგილზევე დასჯას ეხებოდა.
თუმცა, ამიერიდან, საფრანგეთში ქუჩაში სექსუალური ხასიათის შეძახილებისა და აგრესიული ქცევისათვის დამნაშავე 750 ევროთი დაჯარიმდება.
პარლამენტარებმა კანონპროქტი მეორე მოსმენით მიიღეს. კანონის მიღება მოხდა ვიდეოს გავრცელების შემდეგ, რომელმაც მთელი საფრანგეთი აღაშფოთა. ვიდეოზე ჩანს, როგორ ცემენ პარიზში სტუდენტ ქალს. შემთხვევა გასულ სამშაბათს მოხდა. დაზარალებული სამუშაოდან ბრუნდებოდა და მას უცნობმა კაცმა ქუჩაში სიტყვიერი შეურაცხჰყოფა მიაყენა. ქალმა სთხოვა გაჩუმებულიყო, თუმცა მოძალადე მიუახლოვდა და ცემა დაუწყო.
„ამ კანონით საფრანგეთის მთავრობა ხაზს უსვამს იმ ფაქტს, რომ ქალთა შევიწროება დაუშვებელია, ისევე, როგორც საზოგადოების თავშეყრის ადგილებში, ასევე, ტრანსპორტში ან ონლაინ სივრცეში“, – განაცხადა გენდერული თანასწორობის საკითხებში საფრანგეთის სახელმწიფო მინისტრმა მარლენ შიაპამ.
მისივე განმარტებით, მაგალითად, ჯარიმას გადაიხდიან პირები, ვინც ქუჩაში ქალს ტელეფონის ნომერს ბევრჯერ მოსთხოვს, მაშინ, როდესაც საპასუხოდ ქალი ინტერესს არ გამოხატავს.
ახალი კანონი ასევე, იმ პირთა დასჯას ითვალისწინებს, ვინც ონლაინ სივრცეში ქალების ჯგუფურად შევიწროებაში იქნება შემჩნეული.
ახალი კანონის ოპონენტები ამტკიცებენ, რომ ის "ფრანგულ ტრადიციებს" ეწინააღმდეგება.
|
