ზაფხულის ბოლო თვეში ტუნისში რამდენიმე რეზონანსული დანაშაული მოხდა, რომელმაც საზოგადოების პროტესტი და აღშფოთება გამოიწვია.
ადგილობრივი მედიის ცნობით, 23 წლის კაცმა სამი წლის გოგონა გააუპატიურა. ბავშვი საავადმყოფოში გადაიყვანეს და მას გადაუდებელი ოპერაცია ჩაუტარდა.
ამ ეტაპზე ბავშვი კვლავ საავადმყოფოში სპეციალისტების ზედამხედველობის ქვეშ რჩება. სასამართლოს წარმომადგენლის განცხადებით დამნაშავე დაკავებულია. ცნობილი გახდა, რომ მოძალადე მსხვერპლის შორეული ნათესავია. მას ჰყავს მეუღლე და შვილები. ტუნისის რევოლუციის შემდეგ ის ამნისტიით გაათავისუფლეს.
რამდენიმე დღის წინ კი ტუნისის ქალაქ გუბელათში, ხუთი დამნაშავე მოხუცებული ქალის სახლში შეიჭრა. გარდა მოხუცისა, სახლში მისი 55 წლის ქალიშვილი და 15 წლის შვილიშვილი იმყოფებოდნენ. მოძალადეებმა ისინი სასტიკად სცემეს და შემდეგ ყველა გააუპატიურეს. წასვლისას დამნაშავეებმა მათთან ერთად გოგონა წაიყვანეს. სამი დღის განმავლობაში არასრულწლოვანი მძევლად ჰყავდათ, განაგრძობდნენ მის ცემას და გაუპატიურებას. საბედნიეროდ გოგონა ქალაქის გარეუბანში ცოცხალი იპოვეს. როგორც ცნობილი გახდა, ერთ-ერთი თავდამსხმელი პოლიციელი იყო და დაზარალებულების მეზობლად ცხოვრობდა. ეჭვმიტანილების დაკავების შემდეგ გაირკვა, რომ ისინი ნარკოტიკების და ალკოჰოლის გავლენის ქვეშ იმყოფებოდნენ.
ტუნისში ქალთა და ბავშვთა უფლებები სულ ახლახან გახდა დისკუსიის საგანი, სექსუალური ძალადობის ფაქტები კი ძალზე ხშირია.
