კატეგორია: გენდერული ძალადობა 
2018-10-22
ავსტრალიამ სექსუალური ძალადობის მსხვერპლებს ბოდიში მოუხადა. ემოციური მიმართვა ქვეყნის პრემიერ-მინისტრმა, სკოტ მორისონმა ასობით ადამიანის წინაშე წაიკითხა.
სახელმწიფო ბოდიშს წინ უძღვოდა ხუთწლიანი გამოძიება, რომელიც 2017 წლის დეკემბერში დასრულდა. გამოძიების ფარგლებში 8000-ზე მეტი მოწმე დაიკითხა და დადგინდა, რომ ისეთ სახელმწიფო ინსტიტუტებში, როგორიცაა ეკლესია, სკოლები და სპორტული კლუბები, ათასობით ბავშვი სექსუალური ძალადობის მსხვერპლი გახდა. ბავშვების მიმართ სექსუალური ძალადობის საგამოძიებო კომიტეტმა 409 რეკომენდაცია გასცა.
"რატომ უგულებელვყოფდით ბავშვებისა და მშობლების ხმებს? რატომ იყო ჩვენი მართლმსაჯულების სისტემა ბრმა უკანონობის მიმართ? რატომ დაგვჭირდა ამდენი დრო მოქმედებების დასაწყებად ... დღეს, ჩვენ საბოლოოდ ვაღიარებთ და ვუპირისპირდებით ჩვენი ბავშვების დაკარგულ ყვირილს", - განაცხადა პრემიერ-მინისტრმა სიტყვით გამოსვლის დროს.
სკოტ მორისონმა აღიარა, რომ ბავშვებზე ძალადობდნენ იქ, სადაც მათ ყველაზე მეტად უნდა ეგრძნოთ თავი დაცულად, ხოლო მათ ამის შესახებ არავინ უჯერებდა.
პრემიერ-მინისტრის გამოსვლას ესწრებოდნენ ძალადობის მსხვერპლები და მათი ოჯახის წევრები. ბევრ ახლობელს მაისურებზე ეწერათ თავიანთი ნათესავების სახელები, რომლებიც სექსუალური ძალადობის მსხვერპლები გახდნენ და ცოცხლები აღარ არიან.
სახელმწიფო ბოდიშის ნიშნად ავსტრალიის პარლამენტის წინ მემორიალი დაიდგა.
|
