დემოკრატების წარმომადგენლებმა აშშ-ს კონგრესში წარადგინეს კანონპროექტი, რომელიც უზრუნველყოფს ქალებისა და კაცებისთვის თანაბარ ანაზღაურებას და დამსაქმებელთა გამჭვირვალობას სამუშაო ადგილზე.
ფედერალური მთავრობის ანგარიშვალდებულების ოფისის მონაცემებით შეერთებულ შტატებში კაცების ანაზღაურება აღემატება იმავე სამუშაოზე მომუშავე ქალების შემოსავალს.
ქალთა პოლიტიკური კვლევების ინსტიტუტის (IWPR) კვლევის თანახმად, აშშ-ი ქალები სამუშაო ძალის თითქმის ნახევარს წარმოადგენენ და კაცებისთვის გადახდილ თითო დოლარზე, იგივე სამუშაოში თეთრკანიან ქალს 81 ცენტს, აფროამერიკელს 61 ცენტს, ხოლო ლათინოამერიკელს 53 ცენტს უხდიან. წარსულში მსგავს დისკრიმინაციას ქალების ნაკლები განათლებით ხსნიდნენ, თუმცა მონაცემების მიხედვით, აშშ-ში ბაკალავრისა და მაგისტრის წოდების 58 % -ი ქალებმა მოიპოვეს, ამასთან პირველად ამერიკის ისტორიაში სადოქტორო ხარისხის რაოდენობის მხრივ ქალებმა კაცები დაჯაბნეს.
კვლევის შედეგად კიდევ ერთი საინტერესო ფაქტი გამომჟღავნდა , დაქორწინებული ქალები ოჯახის მქონე კაცების ანაზღაურების 79 %-ს იღებენ, თუმცა ბევრი ამის მიზეზად კარიერაში წინსვლის ნაკლები სურვილით ხსნიან, რასაც შესაძლოა სამუშაო საათების მატება და მივლინებები ახლდეს თან.
IWPR- ის ანგარიშის თანახმად, კანონპროექტის მიღებით ეროვნულ ეკონომიკას 513 მილიარდი დოლარი დაემატება და ორჯერ შეამცირებს სიღარიბის დონეს ოჯახებში, სადაც ქალები დასაქმებულები არიან.
IWPR ექსპერტები პროგნოზირებენ, რომ კანონპროექტის არ მიღების შემთხვევეში, თანაბარი სამუშაოსთვის თანაბარ ანაზღაურებას თეთრკანიანი ქალები 2059 წლამდე, აფროამერიკელები 2119 წლამდე, ხოლო ლათინოამერიკელები 2224 წლამდე არ მიიღებენ.
საინტერესოა, რომ პირველი აქტი, რომელსაც აშშ-ს პრეზიდენტმა ბარაკ ობამამ ხელი 2009 წელს მოაწერა, იყო დოკუმენტი თანაბარი ანაზღაურების შესახებ, თუმცა, კაცისა და ქალის ანაზღაურებას შორის განსხვავება ქვეყანაში კვლავაც არსებობს.
