კატეგორია: გენდერული ძალადობა 
2019-09-12
ახალი ზელანდიის პრემიერ- მინისტრმა იასინდა არდერნმა, ბოდიში მოიხადა მიკერძოებული გამოძიებისთვის, რომელიც უკავშირდება ლეიბორისტულ პარტიაში მომხდარ სექსუალური შევიწროების სკანდალს. სკანდალში გაეხვა ლეიბორისტული პარტიის ერთ-ერთი წევრი, რომლის ვინაობაც ცნობილი არ არის . 11 სექტემბერს მომხდარი ფაქტის გამო გადადგა ლეიბორისტული პარტიის თავმჯდომარე ნაიჯელ ჰოვორტი. ინფორმაციას მომხდარის შესახებ The Guardian -ი ავრცელებს.
გასულ წელს, ლეიბორისტული პარტიის 19 წლის მოხალისემ, პარტიის ერთ-ერთი წევრი სექსუალურ შევიწროებაში დაადანაშაულა, მომხდარის შესახებ მან პარტიის ლიდერებს აცნობა. გოგონას განცხადებით, შემთხვევა 2018 წლის დასაწყისში, კერძო შეხვედრაზე მოხდა.
ეს შემთხვევა რიგით მეშვიდეა, რომელიც უკავშირდება ამ კონკრეტული პარტიის წევრის მხრიდან სექსუალური შევიწროების ფაქტებს. დაზარალებულების განაცხადებით ისინი კონკრეტულად ამ პარტიის წევრისგან განიცდიდნენ ბულინგს და სექსუალურ შევიწროვებას.
სავარაუდო დანაშაულთან დაკავშირებით ლეიბორისტული პარტიის ინიციატივით ჩატარდა გამოძიება. გამოძიების შედეგად ლეიბორისტულმა პარტიამ დაასკვნა რომ, ბრალდებულის მიმართ არ არის საჭირო დისციპლინური ზომების გამოყენება. თუმცა გასულ თვეში ახალი საჩივრების გამო იასინდა არდერნმა საქმის ხელახალი განხილვის ბრძანება გასცა, რის შემდეგაც ლეიბორისტული პარტიის თავმჯდომარე თანამდებობიდან გადადგა.
”ლეიბორისტული პარტიის სახელით, ბოდიშს ვუხდი ყველა მომჩივარს ამ საქმეების არასათანადოდ განხილვისთვის. საკმაოდ რთულია სექსუალური ძალადობის შესახებ ლაპარაკი, ასეთი საქმეების განხილვა დამატებით სტრესს იწვევს მომჩივრებში. ეს ფაქტქი ძალიან შემაშფოთებელია,,-განაცხადა არდერნმა პარტიის თავმჯდომარის ნაიჯელ ჰოვორტის გადადგომის მიღების შემდეგ.
ეს არ არის პირველი შემთხვევა, როდესაც ახალი- ზელანდიის ლეიბორისტული პარტიის წევრებს ადანაშაულებენ სექსუალური შევიწროების ფაქტების დამალვაში. 2018 წელს პარტიის საზაფხულო ბანაკის ოთხმა მონაწილემ ბრალი დასდო პარტიის წევრს სექსუალურ შევიწროებაში. საქმე დღემდე განიხილება სასამართლოში.
|
