კატეგორია: გენდერი მსოფლიოში 
2019-10-29
იაპონიაში, 92 წლის ასაკში, გარდაიცვალა სადაკო ოგატა- პირველი და ერთადერთი ქალი, რომელიც გაეროს ლტოლვილთა უმაღლესი კომისრის თანამდებობას იკავებდა.
90-იან წლებში მისი დანიშვნა ამ თანამდებობაზე დაემთხვა რუანდაში განხორციელებულ გენოციდს და ყოფილ იუგოსლავიაში არსებულ ეთნიკურ კონფლიქტს.
მისიის ფარგლებში და იძულებით გადაადგილებული პირების დასახმარებლად მან მრავალი კონფლიქტის ზონა მოიარა მსოფლიოში.
ოგატა დაიბადა 1927 წლის 16 სექტემბერს ტოკიოში, ცნობილი პოლიტიკური მოღვაწეების ოჯახში. მისი პაპა 1931 წლიდან 1932 წლამდე იყო იაპონიის პრემიერ- მინისტრი, ხოლო ბაბუა 1932 წელს ქვეყნის საგარეო საქმეთა მინისტრის თანამდებობას იკავებდა.
ოგატამ ბავშვობა საზღვარგარეთ გაატარა, მათ შორის აშშ-სა და ჩინეთში. ტოკიოს ქალთა უნივერსიტეტის დამთავრების შემდეგ მან სწავლა შეერთებულ შტატებში განაგრძო, სადაც კალიფორნიის უნივერსიტეტში პოლიტიკურ მეცნიერებაში დოქტორის წოდება მიიღო.
მისი კარიერის განმავლობაში ოგატა მუშაობდა მრჩევლად იაპონიის წარმომადგენლობაში, გაეროში და ხელმძღვანელობდა გაეროს ბავშვთა ფონდის საბჭოს.
ის ასევე წარმოადგენდა თავის ქვეყანას გაეროს ადამიანის უფლებათა კომიტეტში.
2003 წელს ოგატა გახდა იაპონიის საერთაშორისო თანამშრომლობის სააგენტოს (JICA) პირველი პრეზიდენტი, რომელიც მხარს უჭერდა ისეთ ქვეყნებს, როგორიცაა ავღანეთი და სამხრეთ სუდანი.
2015 წლის ინტერვიუში მან მოუწოდა იაპონიის მთავრობას ლტოლვილთა საკითხებში მეტი ლიდერობა გამოეჩინა.
საინტერესოა, რომ შარშან იაპონიამ 10 000-ზე მეტი აპლიკანტიდან მხოლოდ 42 ლტოლვილი მიიღო.
|
