Категория: Гендер на Кавказе 
2020-03-05
შუახევის მუნიციპალიტეტის "ქალთა ოთახის" პროექტი "ჩვენ და სუფთა გარემო" იაპონიის საელჩოს საგრანტო კონკურსის გამარჯვებული გახდა.
პროექტი ითვალისწინებს სანიტარული დასუფთავების სერვისის გაუმჯობესებას შუახევის მუნიციპალიტეტში, მისი მიზანი კი ნარჩენების მართვის სექტორში ქალთა ჩართულობის გაზრდა და სოფლად მცხოვრები ქალების სოციალურ- ეკონომიკური გაძლიერებაა.
მუნიციპალიტეტში 20-მდე ქალს გააჩნია საკუთარი საოჯახო ტიპის სასტუმრო და მათი განვითარების პერსპექტივები დაკავშირებულია ტურისტების რაოდენობაზე, ეს დარგი კი მაღალ ეკოლოგიურ სტანდარტებს მოითხოვს.
პროექტის ფარგლებში შეიქმნება ქალთა საინიციატივო ჯგუფები, რომლებიც საგანმანათლებლო ხასიათის იქნება. მუნიციციპალიტეტში სხვადასვა აქტივობები ჩატარდება, მაგალითად: კონკურსი „ყველაზე სუფთა თემი“, მოსახლეობის სანიტარული კულტურის ამაღლების, ინფექციის გავრცელების რისკების აღმოფხვრის ღონისძიებები და სხვა.
ახალი მუნიციპალური სერვისი - „ქალთა ოთახი“ აჭარაში, კერძოდ კი შუახევის მუნიციპალიტეტში პირველად 2015 წელს გაიხსნა. „ქალთა ოთახი“ - ეს არის საინფორმაციო-საკონსულტაციო სერვისი, ღია სივრცე შეხვედრებისა და ტრენინგების ჩასატარებლად. მისი მიზანია ადგილობრივ მოსახლეობას, განსაკუთრებით სოფლად მცხოვრებ ქალებს დაეხმაროს მუნიციპალიტეტთან ურთიერთობაში, გაზარდოს/ წაახალისოს ქალთა თანამონაწილეობა თვითმმართველობის დონეზე გადაწყვეტილების მიღების პროცესში და მათი ჩართულობა სხვადასხვა სოციალურ პროგრამებში.
დღეს აჭარაში ექვსი „ქალთა ოთახი“ ფუნქციონირებს. |
