"ქართული პარტიის" პოლიტსაბჭოს წევრი სოფიო ხორგუანი ხელისუფლებას დევნილთა გამოსახლების პროცესის გამჭვირვალედ ჩატარებისკენ და მათთვის ადექვატური კომპენსაციით დაკაყოფილებისკენ მოუწოდებს.
ამის შესახებ ხორგუანმა დღეს გამართულ ბრიფინგზე განაცხადა და აღნიშნა, რომ იმ დევნილების უფლებების დასაცავად, რომლებმაც საკომპენსაციო თანხის - 10000 აშშ დოლარის სანაცვლოდ, საცხოვრებელ ფართზე უარი თქვეს, მაგრამ ეს თანხა დღემდე არ მიუღიათ, სასამართლო დავა გრძელდება.
ამასთან, სოფიო ხორგუანის თქმით, ხელისუფლება მოსახლეობას კიდევ ერთ უსიამოვნო სიურპრიზს უმზადებს, რაც ბაგა-ბაღების მომსახურების გაძვირებაში გამოიხატება.
"მართალია, ხელისუფლება ცდილობს დაგვარწმუნოს, რომ ეს მოქალაქეების ინტერესების დასაცავად კეთდება, მაგრამ ბავშვი და ოჯახი ნამდვილად არ არის მისი პრიორიტეტი", - აცხადებს "ქართული პარტიის" პოლიტსაბჭოს წევრი.
ამასთან, მისივე თქმით, დღეს იწურება თბილისის მერიიდან ინფორმაციის მიღების ვადა იმის თაობაზე, მმართველობის რა ფორმით გადაეცა მას ბოტანიკური ბაღი და რა შენობა-ნაგებობებზეა საუბარი.
თბილისის მერიის გარდა, "ქართულმა პარტიამ" წერილობით განათლებისა და მეცნიერების სამინისტროსაც მიმართა და მოითხოვა საჯარო ინფორმაცია იმის შესახებ, თუ რა კრიტერიუმებით იხელმძღვანელა დიმიტრი შაშკინის უწყებამ, როდესაც ბოტანიკის, ფილოსოფიის და ფსიოქოლოგიის ინსტიტუტებს დაფინანსება შეუწყვიტა.
"თუ თბილისის მერია და განათლებისა და მეცნიერების სამინისტრო აღნიშნულ საჯარო ინფორმაციას არ მოგვაწვდიან, სასამართლოს მივმართავთ და ამ ინფორმაციის მოპოვებას სასამართლოს გზით შევეცდებით", - აღნიშნა სოფიო ხორგუანმა.
ბრიფინგზე პარტიის პოლიტსაბჭოს წევრი თბილისის ტელეანძის აუქციონის საკითხსაც შეეხო.
ხორგუანის განცხადებით, "ქართული პარტია" წერილობით მიმართავს ეკონომიკისა და მდგრადი განვითარების სამინისტროს და მოითხოვს, აუქციონში გამარჯვებულ კომპანიასთან გაფორმებული ხელშეკრულება და პასივების და აქტივების სრული ჩამონათვალი მოაწოდონ.
სოფიო ხორგუანის თქმით, დღეს თბილისის საქალაქო სასამართლოში "ქართული პარტიის" დახმარებით შეტანილი სარჩელი იხილება, რომელიც შეიცავს მოთხოვნას იმის შესახებ, რომ მიწის ფასები განისაზღვროს ისე, რომ გლეხს მისი შესყიდვის შესაძლებლობა მიეცეს.
ხორგუანის განცხადებით, "ქართული პარტია" ყველაფერს გააკეთებს, რომ გლეხი მიწის გარეშე არ დარჩეს და საარსებო საშუალება არ წაერთვას.
Using materials of the site the reference on GINSC with the indication of the author is obligatory The Portal GINSC is supported by the Kvinna til Kvinna Foundation
