Category: Gender in the world 
2018-12-19
მსოფლიოს ეკონომიკურმა ფორუმმა 2018 წლის გენდერული სხვაობის რეიტინგი გამოაქვეყნა, სადაც საქართველო 94–ე ადგილიდან (2017) 99–ე გადაინაცვლა.
ანგარიში 149 ქვეყნის მონაცემებზე დაყრდნობითაა შედგენილი.
იმის გამო, რომ რეიტინგი 4 ძირითადი კრიტერიუმის მიხედვით დგება, თითოეულ ქვეყანას ცალ-ცალკე შეფასება და ინდექსი ენიჭება ქალთა ჯანდაცვის, მათი პოლიტიკური ჩართულობის, ეკონომიკის სფეროში აქტიურობისა და განათლების კუთხით.
საქართველოში სქესთა შორის ეკონომიკური სხვაობის მაჩვენებელის ინდექსი 85–ია (2017 – 75–ე). ყველაზე დაბალი მაჩვენებელი საქართველოს ქალთა ჯანმრთელობის დაცვისა (123) და პოლიტიკური გაძლიერების (119) კუთხით აქვს. განათლების ხელმისაწვდომობის ინდექსი კი 81–დან 60–ე გადაინაცვლა.
მსოფლიოს ეკონომიკური ფორუმის ანგარიშის მიხედვით, იმისათვის რომ მსოფლიოში მივაღწიოთ გენდერულ თანასწორობას, მათ შორის ქალსა და კაცს შორის ეკონომიკური უთანასწორობის დასაძლევად კაცობრიობას კიდევ 202 წელი დასჭირდება. გენდერული თანასწორობა პოლიტიკაში, ჯანდაცვაში და განათლების სფეროში ერთი წლის განმავლობაში მხოლოდ 0,1%-ით გაიზარდა, რაც იმას ნიშნავს, რომ პარიტეტის მისაღწევად საჭიროა კიდევ 108 წელი. ეკონომიკური შესაძლებლობები ყველაზე დიდ პრობლემად რჩება ამ სფეროში.
„გლობალურ მასშტაბით ჩვენ ვხედავთ, რომ არ არსებობს ერთი ქვეყანაც კი, რომელმაც მიაღწია გენდერულ თანასწორობას, მიუხედავად განვითარების დონისა“, - განაცხადა გაეროს სტრუქტურა „გაერო-ქალების“ დირექტორმა ანა-კარინ ჯატფოსმა.
ანგარიშის მიხედვით რეიტინგის ლიდერები ისლანდია, ნორვეგია, შვედეთი და ფინეთია. ყველაზე დაბალ პოზიციებს იკავებენ საუდის არაბეთი, ირანი, ჩადი, სირია, ერაყი, პაკისტანი და იემენი.
|
