Category: Women and Culture 
2019-07-26
ვენეციის რიგით 76-ე საერთაშორისო კინოფესტივალზე 21 რეჟისორის ფილმი შეირჩა, აქედან მხოლ ორი ქალი რეჟისორის - ჰაიფა ალ-მანსური ფილმით "იდეალური კანდიდატი" და შენონ მერფი ფილმით "სარძევე კბილი".
ამ თვალსაზრისით, კინოფესტივალისთვის ეს უპირობო პროგრესია, რადგან გასულ წელს მხოლოდ ერთმა ქალმა რეჟისორმა (ჯენიფერ კენტი ფილმით „ბულბული“) მიიღო მონაწილეობა ფესტივალი საკონკურსო პროგრამაში.
შედარებისთვის წელს კანის კინოფესტივალზე ოთხი, ხოლო ბერლინის კინოფესტივალზე შვიდი ქალი რეჟისორის ფილმები იყო წარმოდგენილი.
სოციალურ ქსელებში აქტიურად გამოთქვამენ უკმაყოფილებას ამ ფაქტთან დაკავშირებით და ასევე აღნიშნავენ, რომ გენდერული დისბალანსის ფონზე მოწვეულ რეჟისორთა შორის რომან პოლანსკია, რომელიც არაერთხელ დაადანაშაულეს არასრულწლოვანთა გაუპატიურებაში.
ორგანიზაცია „ქალები და ჰოლივუდი“ დამფუძნებელმა მელისა სილვერსტეინმა თავის ტვეტერზე დაწერა: "1 მოძალადე და 2 ქალი რეჟისორი #Venezia76-ზე. რამე ხომ არ გამომრჩა?".
ბრიტანელმა ჟურნალისტმა ანიტა სინგმა კი შემდეგი პოსტი გამოაქვეყნა: "ორი რეჟისორი ქალი 21-დან და წითელი ხალიჩა რომან პოლანსკისთვის. ბრწყინვალე სამუშაოა, ვენეცია. "
აღსანიშნავია, რომ ვენეციის რიგით 76-ე საერთაშორისო კინოფესტივალის ჟიურის პრეზიდენტი არგენტინელი რეჟისორი ლუკრესია მარტელი იქნება. იგი ფესტივალის ისტორიაში მეშვიდე ქალია, რომელსაც აღნიშნული პატივი ხვდა წილად.
კინოფესტივალის მხატვრულმა ხელმძღვანელმა ალბერტო ბარბერამ ლუკრესია მარტელს ლათინური ამერიკის ყველაზე მნიშვნელოვანი და თანამედროვე მსოფლიოს ერთ-ერთი საუკეთესო ქალი რეჟისორი უწოდა. მისივე თქმით, მარტელმა მხოლოდ ოთხი სრულმეტრაჟიანი სურათითა და რამდენიმე მოკლემეტრაჟიანი ფილმით შეძლო აღიარების მოპოვება.
შეგახსენებთ, რომ ვენეციის რიგით 76-ე საერთაშორისო კინოფესტივალი გაიხსნება 2019 წლის 28 აგვისტოს.
|
