რეკლამის სტანდარტების ბრიტანულმა კომიტეტმა ცნობილ მოდელს ნაომი კემპბელს მხარი არ დაუჭირა და რასიზმთან დაკავშირებული მისი ბრალდებები შოკოლადის მწარმოებელი ფირმის Cadbury-ის მიმართ გააბათილა.
შეგახსენებთ, შავი ავაზა შოკოლადის ბრენდის სარეკლამო პლაკატებზე გაკეთებულმა წარწერამ აღაშფოთა, სადაც კემპბელი შოკოლადთან არის შედარებული. სლოგანი გვამცნობს: "გაიწიე ნაომი, ქალაქში ახალი დივა გამოჩნდა".
კემპბელმა კომპანია რასიზმში დაადანაშაულა. მწარმოებლებმა რეკლამები მთლიანად გაანადგურეს და მოდელის დარწმუნება სცადეს იმაში, რომ არავის წყენინება არ სურდათ, უბრალოდ, დაუფიქრებლად მოიქცნენ.
ამის შემდეგ ბრენდის მესვეურებმა ნაომის თავიანთ პერსონალურ ვებ-გვერდზე ბოდიშიც კი მოუხადეს.
მაგრამ ნაომის დამშვიდება არც ისე იოლი აღმოჩნდა. მან რეკლამის სტანდარტების ბრიტანულ კომიტეტს მიმართა, თუმცა ამაოდ - ბრიტანულმა კომიტეტმა დაასკვნა, რომ რეკლამა აბსოლუტურად გასაგებია და ნაომის შოკოლადის ფილასთან შედარება, მხოლოდ და მხოლოდ მისი პოპულარობის წყალობით მოხდა და რასიზმი აქ არაფერ შუაშია.
