CNN-ზე საქართველოს შესახებ რეპორტაჟების ციკლი გრძელდება. დღეს ტელეარხზე საქართველოს პირველი ლედის სანდრა ელისაბედ რულოვსის შესახებ რეპორტაჟი გავა.
თბილისიდან პირდაპირ ეთერში ჟურნალისტი პაოლა ნიუტონი ერთვება. წინა რეპორტაჟებში მან პოლიციასა და განათლების სისტემაში გატარებულ რეფორმებზე ისაუბრა.
პაოლა ნიუტონის თქმით, "ქართული სკოლები ახლა ლაბორატორიას ჰგავს, სადაც საუკეთესო მეთოდებს სინჯავენ".
სიუჟეტში განათლების მინისტრ დიმიტრი შაშკინის ინტერვიუც მოხვდა, რომელმაც სკოლებს შორის კონკურენციის აუცილებლობაზე ისაუბრა.
რაც შეეხება პოლიციაში გატარებულ რეფორმებს, პაოლა ნიუტონის თქმით, "საქართველო ერთ-ერთი პირველია იმ ქვეყნებს შორის, სადაც კრიმინალის ყველაზე დაბალი მაჩვენებელია".
ჟურნალისტი იმასაც აღნიშნავს, რომ "რეფორმების ფარგლებში ძველი სისტემის ასობით თანამშრომლის დათხოვნა გახდა აუცილებელი, თუმცა პოლიციის ახალი თანამშრომლები უკეთესი პროფესიონალები არიან და მოსახლეობის ნდობისა და სიყვარულის მოპოვება შეძლეს".
პაოლა ნიუტონი CNN-ის ეთერში რესტორან "ქალაქურიდანაც" ჩაერთო. გარდა ამისა, იგი “მოამბის” გადამღებ ჯგუფს გაესაუბრა.
ცნობისთვის, CNN-ზე საქართველოს შესახებ რეპორტაჟების სერია უკვე ერთი კვირაა, გადის.
გადამღები ჯგუფი საქართველოში პარასკევამდე დარჩება.
