ფონდ „ღია საზოგადოება საქართველოს“ ფინანსური მხარდაჭერით პროექტის პრეზენტაცია გაიმართა, რომელიც ეთნიკური უმცირესობების წარმომადგენლებს ელექტრონულად ქართული ენის შესწავლას სთავაზობს.
„ქართული ენის ელექტრონული სწავლების კურსი“ თსუ არნოლდ ჩიქობავას სახელობის ენათმეცნიერების ინსტიტუტის ვებგვერდზეა (www.ice.ge/elearning_geo ) განთავსებული.
პროექტის ავტორის და ხელმძღვანელის, ასევე, არნოლ ჩიქობავას სახელობის ენათმეცნიერების ინსტიტუტის დირექტორის მოადგილის მანანა მანჯგალაძის თქმით, ეს არის პირველი უფასო ელექტრონული რესურსი, რომელიც ნებისმიერი მსურველისათვისაა ხელმისაწვდომი და ის ენის ფლობის დონეთა ევროპული სტანდარტის მიხედვითაა აგებული.
“ეს პროექტი ხელს შეუწყობს ეთნიკური უმცირესობების წარმომადგენლებს შეისწავლონ ქართული ენა. პროექტს ახლავს გზამკვლევი და გამოყენების ინსტრუქცია, რომელიც ვებ-გვერდზეა განთავსებული. გავითვალისწინეთ, რომ ზოგიერთ რეგიონში შეიძლება არ იყოს ინტერნეტი ამიტომ დისკებზე ჩავწერეთ გაკვეთილები და უკვე ძალიან დიდი ნაწილი გავავრცელეთ.”
პროექტის ავტორების ინფორმაციით, ელექტრონული კურსი საშუალებას აძლევს კომპიუტერის ნებისმიერ მომხმარებელს, ასაკის შეუზღუდავად, ეტაპობრივად, საფუძვლიანად შეისწავლოს ქართული ენა - ლექსიკა, გრამატიკა, ფრაზეოლოგია. გამართოს მეტყველება, დახვეწოს წერის კულტურა. ყველა ინსტრუქცია და გრამატიკის ბლოკი წარმოდგენილია როგორც ქართულ, ასევე სომხურ და აზერბაიჯანულ ენებზე. A1, A2 და B1 დონეები მთლიანობაში 100 თემას აერთიანებს.
კურსი შეიცავს 316 (რვა ტიპის) ინტერაქტიულ სავარჯიშოს, 142 საკითხავ ტექსტს, 702 ზეპირ და წერით სავარჯიშოს, 168 თვითშეფასების ტესტს, 125 აუდიოფაილს, 33 ანიმაციურ ფაილს, 12 ვიდეო- და 161 გრაფიკულ ფაილს.
“სურბ ეჩმიაძინის” სახელობის ეკლესიასთან არსებული სომხური კულტურული ცენტრის “ჰაიარტუნის” პრესპიკერი სუსანა ხაჩატურიანი ამბობს, რომ ეს პროექტი ეთნიკური უმცირესობებისთვის ძალიან მნიშვნელოვანია, რადგან საქართველოში არის ისეთი რეგიონები, სადაც კომპაქტურადაა ჩასახლებული არაქართული მოსახლეობა და მათ არ აქვთ გარშემო ურთიერთობის და ენის სწავლის საშუალება.
“არაქართველმა მოსახლეობამ, რომლებიც საქართველოში ცხოვრობს. ხშირად არ იცის სახელმწიფო ენა, ამიტომ ეს იქნება დამხმარე რგოლი რომ ისწავლონ ქართული ენა. ვიცი რამდენიმე სომხეთის მოქალაქე, ვისაც დიდი სურვილი აქვს ისწავლოს ქართული და იმათთვისაც ხელმისაწვდომი იქნება.”
პროექტი პირველი უფასო ელექტრონული პროდუქტია, რომელიც ხელს უწყობს აზერბაიჯანელი და სომეხი მოსახლეობის ინტეგრაციას სახელმწიფო ენის შესწავლის თვალსაზრისით.
