საქართველოს პრემიერმინისტრ ბიძინა ივანიშვილის განცხადებით, ეთნიკურ ჯგუფებთან დაკავშირებით საქართველოში პრობლემა არ არსებობს და საქართველოს ხელისუფლება ყველაფერს გააკეთებს იმისათვის, რომ რეგიონული ენების სტატუსთან დაკავშირებით ევროსაბჭოს წინაშე ნაკისრი ვალდებულებები შეასრულოს.
როგორც პრემიერმა ევროპის საბჭოს საპარლამენტო ასამბლეის სხდომაზე საქართველოში მცხოვრები ეთნიკური უმცირესობების უფლებებზე საუბრისას განაცხადა, საქართველოს ახალი მთავრობა ყველაფერს გააკეთებს იმისთვის, რომ უმცირესობებმა ჩვეულებრივ მოქალაქეებად იგრძნონ თავი და საქართველო იყოს მათთვის ისეთივე სამშობლო, როგორიც ქართველებისათვისაა.
მისივე თქმით, არსებული მდგომარეობაც ეროვნულ უმცირესობებთან მიმართებაში არ შეიძლება უარყოფითად შეფასდეს, მაგრამ გაუმჯობესებას საჭიროებს.
ამასთან, როგორც პრემიერმა აღნიშნა, ეთნიკური უმცირესობებისთვის გაცილებით პრობლემატურია თავად სახელმწიფო ენის შესწავლა.
„არ არსებობს პრობლემები ეროვნული უმცირესობების თუ რეგიონული ენების დაცვის კუთხით. მათთვის სახელმწიფო ენის შესწავლა უფრო დიდი პრობლემაა, ვიდრე რეგიონული ენების შესწავლა თუ დაცვა. პრობლემა უფრო იმაშია, რომ მათ აითვისონ სახელმწიფო ენა, რაც მათ საშუალებას მისცემდა საზოგადეობაში უკეთესი ინტეგრაციისათვის", - განაცხადა პრემიერმა ივანიშვილმა.
