კულტურის მინისტრი საქართველოს ეროვნულ უმცირესობათა საბჭოს წევრებსა და საქართველოს სახალხო დამცველ უჩა ნანუაშვილს ხვდება.
შეხვედრა კულტურის სამინისტროში მიმდინარეობს. კულტურის მინისტრის, გურამ ოდიშარიას თქმით, ეროვნული მრავალფეროვნება საქართველოს დიდი ძალაა. "მრავალფეროვანი მოსახლეობა ჩვენი ქვეყნის ძალა და სილამაზეა, რითაც სხვადასხვა ქვეყნები ინტერესდებიან, თუნდაც თბილისის ერთი უბანი ავიღოთ, სადაც სხვადასხვა აღმსარებლობის კულტურის ძეგლია. ერთმა ჭკვიანმა ადამიანმა თქვა, რელიგია ერთია, ერებს შორის სიყვარული მეორე საკითხიაო. აი სწორედ ამ სიმდიდრის მატარებელია ჩვენი ქვეყანა. რაც შეეხება დღევანდელ შეხვედრას, მოვისმენ რა აწუხებს ჩვენს მეგობრებს. კულტურის სამინისტრო ყოველთვის ეხმარებოდა მათ სხვადასხვა პროექტების განხორციელებაში და მომავალი წლიდან უფრო მნიშვნელოვან კულტურულ პროექტებს განვახორციელებთ", - განაცხადა გურამ ოდიშარიამ.
სახალხო დამცველის, უჩა ნანუაშვილის თქმით, ეროვნულ უმცირესობათა საბჭოს წევრები და ხელისუფლების წარმომადგენლები ხშირად ხვდებიან, რათა ერთობლივად მოხდეს არსებული პრობლემების მოგვარება.
"რეგულარულად ხდება ეთნიკური უმცირესობების საბჭოს წარმომადგენლების შეხვედრა ხელისუფლების წარმომადგენლებთან. ამჯერად კულტურის მინისტრს ვხვდებით. საჭიროა დიალოგი გაღრმავდეს, რაც საშუალებას მოგვცემს კულტურულ კვლევებთან დაკავშირებული პრობლემები მოგვარდეს", - განაცხადა უჩა ნანუაშვილმა.
შეკრებაზე შეკითხვა სომხური თეატრის საკითხზე დაისვა. კერძოდ, კულტურის სამინისტრო გეგმავს თუ არა ავლაბარში მდებარე სომხური თეატრის რესტავრაციას, რაზეც გურამ ოდიშარიამ განაცხადა, რომ მიმდინარე წელს სომხური თეატრის გარემონტება ბიუჯეტში არ არის გათვალისწინებული, თუმცა მომავალ წელს პეტროს ადამიანის სახელობის თეატრის გარემონტება დაგეგმილია. შეხვედრაზე მყოფმა საზოგადოებამ სომხური თეატრის რემონტის სპონსორის დასახელება მოითხოვა, თუმცა კონკრეტული პირის დასახელებისგან კითხვის დამსმელმა და კულტურის მინისტრმა უარი განაცხადეს.