ქეთევან ნოზაძე კატეგორია: ეროვნული უმცირესობები 2013-10-31
გაეროს ქალთა ორგანიზაციამ და სოციალური კვლევისა და ანალიზის ინსტიტუტმა სასტუმრო „ჰოლიდეი ინნ"-ში ქვემო ქართლში ეროვნული უმცირესობების ქალთა მდგომარეობის კვლევის შედეგები წარადგინა.
კვლევის მიზანს წარმოადგენდა ქვემო ქართლში მცხოვრები აზერბაიჯანელი, სომეხი და სხვა უმცირესობების ქალების მდგომარეობისა და საჭიროებების შესწავლა შემდეგი სფეროების მიხედვით: გენდერული თანასწორობა, ოჯახში ძალადობა, ჯანმრთელობა, განათლება, სოციალური დაცვა, ეკონომიკა და სახელმწიფო სერვისების ხელმისაწვდომობა.
როგორც შედეგებმა აჩვენა, გამოკითხულთა დიდი ნაწილი ნაადრევადაა დაქორწინებული. რესპონდენტთა უმრავლესობამ არ იცის ქართული ენა, 7% წერა-კითხვის უცოდინარია, 33%-ს კი არასრული საშუალო განათლება აქვს. მნიშვნელოვან ტენდენციას წარმოადგენს სახელმწიფო სერვისებისა და პროგრამების შესახებ ინფორმაციის ნაკლებობა. საბავშვო ბაღი ხელმიუწვდომელია ქალთა 80%-თვის, რომლებსაც სკოლამდელი ასაკის ბავშვები ჰყავთ და აცხადებენ, რომ მათ დასახლებაში საბავშვო ბაღი არ არის.
ადგილობრივი თვითთმართველობის ორგანოების საქმიანობისა და მათი მოვალეობების შესახებ არ არის ინფორმირებული გამოკითხულთა 77.6%. სამართლებრივი პრობლემების მოსაგვარებლად პოლიციას მხოლოდ 3.6%, ხოლო სასამართლოს - 2.3% მიმართავს. მიზეზი უნდობლობა და საჭირო პროცედურების შესახებ ინფორმაციის ან ფინანსების არქონაა. კვლევა მიმდინარე წლის ივნის-სექტემბრის პერიოდში ჩატარდა და მის ფარგლებში 500 სრულწლოვანი ქალი რესპონდენტი გამოიკითხა.
ეროვნული უმცირსეობის ქალთა საჭიროებებისა და პრიორიტეტების კვლევა ქვემო ქართლის რეგიონში გაეროს ქალთა ორგანიზაციის პროექტის ,,ქალები თანასწორობის, მშვიდობისა და განვითარებისათვის" ფარგლებში ჩატარდა ნორვეგიის მთავრობის ხელშეწყობით.
წყარო: პორტალი GINSC |