ქეთევან ნოზაძე კატეგორია: ეროვნული უმცირესობები 2013-11-19
2013 წლის 18 ნოემბერს, ქვემო ქართლში, თეთრიწყაროს მუნიციპალიტეტში გაიმართა სამუშაო შეხვედრა ,,ერთი ფანჯრის პრინციპით''. შეხვედრის მიზანი იყო სოფელ წინწყაროში მცხოვრები მოსახლეობის, განსაკუთრებით კი ეთნიკური უმცირესობების წარმომადგენელთა მწვავე პრობლემების გადაწყვეტა. შეხვედრას ფასილიტაცია გაუწია ალექსანდრე რუსეცკიმ.
საკონსულტაციო შეხვედრას ესწრებოდნენ ადგილობრივი მუნიციპალიტეტისა და სოციალური მომსახურების სააგენტოს წარმომადგენლები, ასევე, რეგიონული განვითარებისა და ინფრასტრუქტურის სამინისტროს, განათლებისა და მეცნიერების სამინისტროს წარმომადგენლები და ბენეფიციარები, რომლებიც თავად წარადგენდნენ პრობლემურ საკითხებს.
განხილულ იქნა 6 შემთხვევა, მათ შორის ყველაზე მტკივნეული მოსახლეობისათვის სოფლის წყალმომარაგებისა და გაზიფიცირების საკითხი იყო. შეხვედრაზე გადაწყდა, რომ პრობლემა უახლოეს მომავალში მოგვარდება მოსახლეობისა და შესაბამისი სამინისტროების ერთობლივი ძალისხმევით. ზოგიერთი შემთხვევა კომპლექსურ მიდგომას საჭიროებდა და მისი მოგვარება რამდენიმე უწყების კომპეტენციის ფარგლებშია შესაძლებელი. ბენეფიციარებმა მიიღეს ინდივიდუალური კონსულტაცია იმის შესახებ, თუ რომელ სამინისტროს ან მომსახურებას უნდა მიმართონ პრობლემის მოსაგვარებლად. საკონსულტაციო შეხვედრაზე განხილული შემთხვევების გარდა გამოიკვეთა სხვა თემებიც, კერძოდ, მოსახლეობის ინფორმირების საკითხი.
ალექსანდრე რუსეცკიმ შესთავაზა გადაწყვეტილების მიმღებ პირებს, რომ დაინტერესების შემთხვევებში კონსულტაციას გაუწევს მათ, როგორ დაგეგმონ და განახორციელელონ ცვლილებები სწორად. მან ასევე წამოჭრა საზოგადოებასთან ურთიერთობის საკითხი, რადგან მნიშვნელოვანია მოსახლეობა მეტად იყოს ინფორმირებული მათი მომსახურების შესახებ.
,,ერთი ფანჯრის პრინციპის” საკონსულტაციო შეხვედრა გაიმართა პროექტის ,,ქალები თანასწორობის, მშვიდობისა და განვითარებისათვის” ფარგლებში, რომელიც ხორციელდება გაეროს ქალთა ორგანიზაციის მიერ ქალთა საინფორმაციო ცენტრთან და ფონდ ,,ტასოსთან'' თანამშრომლობით, ნორვეგიის მთავრობის მხარდაჭერით.
წყარო: პორტალი GINSC
|
|