ქალთა საინფორმაციო ცენტრი ამერიკის შეერთებული შტატების განვითარების სააგენტოს _ USAID-ის მხარდაჭერით, პროექტს ”ქალები, როგორც აქტორები ცვლილებებისა და გაძლიერებისთვის” იწყებს. პროექტის ფარგლებში პირველი ღონისძიება ერთ-ერთ სამიზნე რეგიონში _ სამცხე-ჯავახეთში, კერძოდ, ბორჯომში 5 მარტს გაიმართა. შეხვედრის მიზანი იყო პროექტის ძირითადი ამოცანებისა და დაგეგმილი აქტივობების ადგილობრივი თვითმმართველობისთვის, რეგიონში მოქმედი ორგანიზაციებისა და მედიასაშუალებების წარმომადგენლებისთვის გაცნობა.
შეხვედრაში მონაწილეობდნენ ქალთა საინფორმაციო ცენტრის, ფონდი ”ტასოს”, ახალგაზრდა ეკონომისტთა ასოციაციის, ადგილობრივი ხელისუფლების, მედიის და სამოქალაქო საზოგადოების წარმომადგენლები, სოფლის რწმუნებულები.
პროექტი ხორციელდება ქალთა საინფორმაციო ცენტრის მიერ, ამერიკის შეერთებული შტატების განვითარების სააგენტოს - USAID-ის მხარდაჭერით, ფონდ ”ტასოსთან”, საქართველოს ახალგაზრდა ეკონომისტთა ასოციაციასთან, ომისა და მშვიდობის გაშუქების ინსტიტუტსა და გალის რაიონში მოქმედ ორგანიზაცია ”ავანგარდთან” პარტნიორობით თბილისის, მცხეთა-მთიანეთის, კახეთის, სამცხე-ჯავახეთის, იმერეთის და გალის მასშტაბით. პროექტის მიზანია სამიზნე რეგიონებში ქალთა პოლიტიკური ჩართულობის ხელშეწყობა სოციალური და ეკონომიკური გაძლიერება თემის მობილიზების გზით და ადგილობრივი საჭიროების კვლევის საფუძველზე.