სახალხო დამცველი რუსული თვითმფრინავის მიერ საჰერო სივრცის დარღვევის ფაქტს ეხმაურება და აცხადებს რომ მოსახლეობა საფრთხის ქვეშ იმყოფება. მისივე განცხადებით, პრობლემის მოსაგვარებლად აუცილებელია ქმედითი ნაბიჯები გადაიდგას.
"სახალხო დამცველი ადამიანის უფლებათა დაცვის მდგომარეობის გაცნობის მიზნით, ზუგდიდის რაიონის სოფელ ხურჩას მოსახლეობას შეხვდა, რა დროსაც, სოფელს დაბალ სიმაღლეზე, ნელი ტემპით თვითმფრინავმა გადაუფრინა.
ადგილობრივების ცნობით, მოსახლეობა კვლავ საფრთხის ქვეშ იმყოფება, რაც ძირითადად გადაადგილების თავისუფლების შეზღუდვასთან არის დაკავშირებული.
გამყოფი ხაზის მიმდებარე ტერიტორიებიდან გრძელდება მოსახლეობის დაკავება რუსი მესაზღვრეების მიერ. მსგავსი ინციდენტები მიუთითებს, რომ რეგიონში უსაფრთხოების გამოწვევები არსებობს, რომელთა გადაჭრაც მოლაპარაკებების გზით უნდა მოხდეს“, - აღნიშნულია ომბუდსმენის განცხადებაში.
სახალხო დამცველი მიიჩნევს, რომ აუცილებელია გადაიდგას ქმედითი ნაბიჯები გალში, ინციდენტების პრევენციისა და მონიტორინგის მექანიზმის აღსადგენად, რაც ხელს შეუწყობს სიტუაციის განმუხტვასა და მოსახლეობის წინაშე არსებული გამოწვევების დაძლევას.