ბათუმის საქალაქო სასამართლომ ადამიანით ვაჭრობისთვის ორი ბრალდებული დამნაშავედ ცნო, აცხადებს საქართველოს მთავარი პროკურატურა.
ბათუმის საქალაქო სასამართლოში ადამიანით ვაჭრობისთვის ბრალდებულების, უზბეკეთის რესპუბლიკის ორი მოქალაქის - ო.ბ-სა და მ.რ-ს საქმის არსებითი განხილვა დასრულდა. მათ უზბეკეთის რესპუბლიკის სამი მოქალაქის მიმართ საქართველოს ტერიტორიაზე ტრეფიკინგის განხორციელება ბრალად ედებოდათ.
პროკურატურის ცნობით, ბობოევამ და რუსტამოვამ უზბეკეთის რესპუბლიკიდან მოტყუებით ჩამოიყვანეს სამი უზბეკი ქალბატონი, ჩამოართვეს უზბეკეთის მოქალაქის პასპორტები, შეუზღუდეს თავისუფლად გადაადგილების უფლება და ფიზიკური ანგარიშსწორების მუქარითა და იძულებით, გარკვეული პერიოდი მათ მიმართ ახორციელებდნენ სექსუალურ ექსპლუატაციას.
გამოძიების ინფორმაციით, 2014 წლის 19 ნოემბერს ბათუმის საქალაქო სასამართლომ, აჭარის ავტონომიური რესპუბლიკის პროკურატურამ საქართველოს სისხლის სამართლის კოდექსის 1431 მუხლის კვალიფიკაციით წარდგენილ ბრალდებებში ო. ბ. და მ. რ სრულად სცნო დამნაშავედ.
ო. ბ-ს დანაშაულის ერთობლიობით საბოლოო სასჯელად 12 წლით თავისუფლების აღკვეთა განუსაზღვრა, ხოლო მ. რ-ს 7 წლით თავისუფლების აღკვეთა შეუფარდა. პროკურატურა აცხადებს, რომ მ. რ. მიმალვაში იმყოფება და მასზე გამოცხადებულია ძებნა.
