კატეგორია: გენდერული ძალადობა 2014-11-21
სასტუმრო ”რედისონ ბლუ ივერია”-ში ძალადობის პრევენციის ეროვნული სტრატეგიის სამუშაო ვერსიის განხილვა გაიმართა. დოკუმენტი შინაგან საქმეთა მინისტრის მოადგილემ - ლევან იზორიამ წარადგინა.
დოკუმენტის წარდგენისას მინისტრის მოადგილემ აღნიშნა, რომ მხოლოდ პოლიციური რესურსებით ძალადობასთან და კრიმინალთან ბრძოლა საკმარის ძალისხმევას არ წარმოადგენს. მნიშვნელოვანია ძალადობის წარმოშობის ფაქტორებისა და პირობების ანალიზი, ყურადღების გამახვილება მის შემცირებაზე, საზოგადოებრივი აზრის გაჯანსაღებაზე ზრუნვა და შესაბამისი სამართლებრივი კულტურის ჩამოყალიბება; აუცილებელია ძალადობის პრევენციისა და მართვის არსებული მექანიზმების შეფასება. მათი ეფექტიანობის გაზრდა და ახალი მექანიზმების დანერგვა.
ძალადობის პრევენციის ეროვნული სტრატეგიით დასახული მიზნების მისაღწევად, სამოქალაქო საზოგადოების აქტიური ჩართულობის და შესაბამისი განხილვების მოწყობის გზით, დაიხვეწება დოკუმენტის სამუშაო ვერსია და სამომავლოდ შეიქმნება ძალადობის პრევენციის ეროვნული სტრატეგიის სამოქმედო გეგმა. ძალადობის პრევენციის ეროვნული სტრატეგიის მიზანს გრძელვადიანი პერსპექტივით შესაბამისი მიმართულების განსაზღვრა წარმოადგენს.
სტრატეგია სახელმწიფოს მზაობის გამოხატულებაა უპასუხოს გამოწვევებს, რომელბიც დღევანდელ საზოგადოებაში არსებობს და მოახდინოს ძალადობის პრევენცია სხვადასხვა საზოგადოებრივი ინსტიტუტის მონაწილეობით.ძალადობის პრევენციის მიზანია ქვეყნის მასშტაბით ძალადობის ფაქტების შემცირება, ძალადობის წინააღმდეგ ბრძოლის გაძლიერება, ამ მიმართულებით სახელმწიფოსა და საზოგადოების აქტიური ჩართულობის უზრუნველყოფა, ძალადობისგან თავისუფალი და უსაფრთხო გარემოს შექმნა.
სტრატეგიამ მოიცვა ძალადობის პრევენციის ყველა ის მიმართულება, რომელიც საზოგადოებისთვის განსაკუთრებით აქტუალურია: ოჯახში ძალადობის, სკოლაში და ქუჩაში ძალადობის პრევენცია შესაბამისი მექანიზმებით. ესენია სამოქალაქო განათლების (დემოკრატიის სწავლება და დამოკიდებულების პრობლემის მავნე შედეგების შესახებ საზოგადოების ინფორმირება), მედიაციისა და რესოციალიზაცია-რეაბილიტაციის კონკრეტული პრევენციული მექანიზმები.
წყარო: პორტალი GINSC
|