სისხლის სამართლის კოდექსში ცვლილებათა კანონპროექტით, ადამიანით ვაჭრობის (ტრეფიკინგის) მსხვერპლის (დაზარალებულის) მომსახურებით მოსარგებლე პასუხისმგებლობისგან გათავისუფლდება, თუ ის სამართალდამცავ ორგანოებთან გამოძიების დაწყებამდე ითანამშრომლებს.
საქართველოს მთავრობა, რომელიც პროექტის ინიციატორია, აცხადებს, რომ კანონპროექტით, სს კოდექსის 143-ე ტერცია მუხლს შემდეგი შინაარსის შენიშვნა დაემატება:
„პირი, რომელმაც ჩაიდინა ამ მუხლით გათვალისწინებული ქმედება, თავისუფლდება სისხლისსამართლებრივი პასუხიმგებლობისგან, თუ მან ამის თაობაზე გამოძიების დაწყებამდე წერილობით ან კომუნიკაციის ნებისმიერი ტექნიკური საშუალებით ნებაყოფლობით მიაწოდა ინფორმაცია სისხლის სამართლის პროცესის მწარმოებელ ორგანოს, ხელი შეუწყო გამოძიების წარმართვას და მის ქმედებაში არ არის სხვა დანაშაულის ნიშნები".
კანონპროექტის ავტორები აცხადებენ, რომ ცვლილებების მიზანი ტრეფიკინგის მსხვერპლთა მომსახურებით სარგებლობის შეტყობინების წახალისებაა, რათა, ერთ მხრივ დანაშაულთან ბრძოლა უფრო ეფექტიანი იყოს, მეორე მხრივ კი ტრეფიკინგთან ბრძოლის სფეროში საზოგადოებასა და სამართალმდამცავ ორგანოებს შორის მჭიდრო თანამშრომლობა ჩამოყალიბდეს.
ინიციატორების თქმით, კანონპროექტის მიღების მიზეზი საქართველოს მიერ სავიზო რეჟიმის ლიბერალიზაციის სამოქმედო გეგმის იმპლემენტაციის შესახებ ევროკომისიის მესამე პროგრესანგარიშში წარმოდგენილი რეკომენდაციებია, რომელთა თანახმადაც, საქართველომ ტრეფიკინგის მსხვერპლთა მომსახურებით სარგებლობასთან ბრძოლა უფრო ეფექტიანად უნდა წარმართოს.
მეორე მხრივ, განმარტებითი ბარათის თანახმად, ცვლილებათა ინიცირების მიზეზია საქართველოს სს კანონმდებლობის ჰარმონიზაცია გაეროს ორგანიზაციის ნარკოდანაშაულთან ბრძოლის ბიუროს მიერ მომზადებულ ადამიანით ვაჭრობის წინააღმდეგ ბრძოლის შესახებ მოდელურ კანონთან, რომლის თანახმად, მიზანშეწონილია, რომ ტრეფიკინგთან ეფექტიანად ბრძოლის მიზნით სახელმწიფოებმა წაახალისონ სამართალდამცავ სტრუქტურებში ტრეფიკინგის სავარაუდო შემთხვევების შეტყობინება, მათ შორის სისხლისსამართლებრივი დევნისგან გათავისუფლების შესაძლებლობით.