აფრიკელ მიგრანტებს შორის, რომლებიც ხმელთაშუა ზღვის გავლით ევროპაში გადადიან, ბევრი ორსული ან ბავშვიანი ქალია. კითხვაზე, თუ რა არის ამის მიზეზი, პასუხი ასეთია – მათ ევროპაში უსაფრთხოდ სურთ მშობიარობა.
თუმცა თუ კარგად გამოიკვლევ, აღმოჩნდება, რომ მიზეზი სხვაა: ეს ორსული ქალები შეიძლება სექსუალური ძალადობის მსხვერპლნი იყვნენ სუბსაჰარული აფრიკიდან ევროპისკენ მიმავალ გრძელ გზაზე, რომელიც ზოგჯერ წლობითაც გრძელდება.
„სექსი ფულის სანაცვლო საზღაურია, რომელსაც სასაზღვრო დაცვას ან პოლიციას უხდიან“, ამბობს ენკარნასიონ მარკესი, სოციალური მუშაკი ესპანეთის სამხრეთი სანაპიროდან, ალხესირასიდან. „ზოგიერთი მიგრანტი სექსით ტრაფიკიორებს ევროპაში გადასვლის საზღაურს უხდის. ეს არის ტრაგედია, რომელზეც არავინ საუბრობს.“
სუბსაჰარული აფრიკიდან ევროპაში მოგზაურობისას კონტრაცეფცია ხელმისაწვდომი არ არის. ხშირია არალეგალური აბორტები. ძალადობა არც ევროპაში ჩასვლის შემდეგ მთავრდება. ათასობით აფრიკელ ქალს ევროპაში ჩასვლისას სექს–მონებად ყიდიან.
მარკესის თქმით, მათ ხშირად აიძულებენ მთელი ანაზღაურება ტრეფიკიორებს მისცენ, რათა აფრიკიდან ევროპაში მგზავრობის ხარჯები აანაზღაურონ. „ეს ქალები ძირითადად აფრიკის სოფლებიდან მოჰყავთ და მათ არაფერი იციან საერთაშორისო მგზავრობის შესახებ,“ ამბობს როსიო მორა, ესპანელი იურისტი, რომელიც საქველმოქმედო ორგანიზაცია APRAMP–ში მუშაობს. „მათ არ იციან, რომ პასპორტები კრინიმალური ქსელების საშუალებით არ უნდა იყიდონ და რომ მგზავრობა $50 000 არ ღირს. მათ სხვა გზა არ იციან. ეს არის 21–ე საუკუნის მონობა, რომელიც ჩვენს თვალწინ ხდება,“ ამბობს მორა.