მასწავლებელთა პროფესიული განვითარების ეროვნულმა ცენტრმა მასწავლებლის თვითშეფასების კითხვარი აზერბაიჯანულ, რუსულ და სომხურ ენებზე თარგმნა.
მასწავლებლის მხარდამჭერი ინსტრუმენტი "ეროვნული უმცირესობებით კომპაქტურად დასახლებული რეგიონების ზოგადსაგანმანათლებლო სკოლების მასწავლებლების პროფესიული განვითარებისა და კარიერული წინსვლის მხარდამჭერის" პროგრამის ფარგლებში ითარგმნა და მიზნად ისახავს უმცირესობის წარმომადგენელი მასწავლებლების საქმიანობის ხელშეწყობას მასწავლებლის საქმიანობის დაწყების, პროფესიული განვითარებისა და კარიერული წინსვლის სქემის ფარგლებში.
თვითშეფასების კითხვარი მასწავლებლებს ეხმარება მათი პროფესიული საჭიროებების დადგენასა და სამომავლოდ, პროფესიული განვითარების დაგეგმვაში.
მასწავლებელთა პროფესიული განვითარების ეროვნულ ცენტრში განმარტავენ, რომ მასწავლებლის საქმიანობის დაწყების, პროფესიული განვითარებისა და კარიერული წინსვლის სქემა 2015 წლის სექტემბრიდან ამოქმედდა. მასში ჩართულია საქართველოს ყველა საჯარო სკოლის მასწავლებელი, მათ შორის, ეროვნული უმცირესობებით კომპაქტურად დასახლებული რეგიონების პედაგოგებიც, რომელთა საერთო რაოდენობაა 7 500.
თვითშეფასების კითხვარის თარგმანების გაცნობას მასწავლებლები მასწავლებელთა პროფესიული განვითარების ეროვნული ცენტრის ოფიციალურ ვებგვერდზე www.tpdc.ge და facebook-ის გვერდზე შეძლებენ.