ხვალ 11:00 საათზე, სასტუმრო „ბეტსიში“ საერთაშორისო რესპუბლიკური ინსტიტუტი (IRI) მართავს პროექტის „ქალთა გაძლიერება უკეთესი ადგილობრივი თვითმმართველობისთვის“ შედეგების პრეზენტაციას.
პროექტის მიზანი იყო საქართველოს სხვადასხვა მუნიციპალიტეტების საკრებულოს ქალ წევრთა გაძლიერება, მათი გადაწყვეტილებების მიღების პროცესში ჩართულობისა და ადგილობრივი მოსახლეობის პრობლემების მოგვარების გზით. პროექტის მნიშვნელოვანი მიღწევა იყო, ქალთა გაერთიანება ერთი კონკრეტული მიზნისთვის, მიუხედავად მათი განსხვავებული პოლიტიკური შეხედულებებისა.
ხვალ საკრებულოს წევრი ქალები რეგიონებიდან ისაუბრებენ თავიანთ მიღწევებსა და გამოწვევებზე. ასევე, წარმატებით განხორციელებულ პროექტებსა და წარუმატებლობის მიზეზებზე.
პრეზენტაციას დაესწრება სხვადასხვა პოლიტიკური პარტიების წევრები, საერთაშორისო და ადგილობრივი ორგანიზაციების წარმომადგენლები. პრეზენტაციას 5 საათზე დახურავს USAID მისიის დირექტორი საქართველოში, ბატონი დუგლას ბოლი.