კატეგორია: ეს საინტერესოა 
2017-10-12
ანა ფრანკი 15 წლის ასაკში გარდაიცვალა. ის იყო ერთ–ერთი იმ მილიონობით ებრაელი ბავშვს შორის, რომლებიც ჰოლოკოსტის დროს დაიღუპა. ახლა მისი ჩანაწერები კომიქსად გადაიქცა, მალე კი ამ უჩვეულო ადაპტაციის მიხედვით ფილმიც გამოვა.
დღეს მისი დღიური (რომელსაც მან Kitty დაარქვა) მსოფლიოში ერთ-ერთი ყველაზე პოპულარული წიგნია. ის გახდა ჰოლივუდის სცენარის, ბროდვეის სპექტაკლებისა და სხვა ნამუშევრების საფუძველი.
ახალი გრაფიკული რომანი შეიცავს ანა ფრანკის დღიურისა და წერილების ფრაზებს, სადაც ის საუბრობდა იმაზე, თუ როგორ შეძლო მისმა ოჯახმა ნაცისტებისგან დამალვა მას შემდეგ, რაც მისი და გადაურჩა შრომით ბანაკში წაყვანას. ანას ოჯახი თითქმის ორი წელი იმალებოდა, თუმცა ნაცისტებმა ისინი მაინც აღმოაჩინეს.
ადაპტაციის ავტორის, არი ფოლმანის თქმით, მისი მიზანია ანას მემკვიდრეობა, რაც შეიძლება უფრო აქტუალური გახადოს.
„ანა ფრანკის დღიური კომიქსის სახით არის კარგი გადაწყვეტილება მომავალი თაობისთვის. ახალ თაობას უნდა ელაპარაკო მისთვის გასაგებ ენაზე. მაშინ უფრო მეტი ადამიანი გაიგებს ამ ისტორიას", - ამბობს ის.
ამავე დროს, ორიგინალური დღიურის პოპულარობა ყოველწლიურად იზრდება.
ანა ფრანკი კი გამბედაობის, ოპტიმიზმის და სიმამაცის სიმბოლოდ არის აღიარებული.
დღიურის ასეთი ადაპტაცია ავტორებისათვის რთული გადაწყვეტილება იყო. ილუსტრატორმა დევიდ პოლონსკიმ თავდაპირველად უარი თქვა ამ იდეაზე. მას ეშინოდა, რომ ჰოლოკოსტის თემა „ინდუსტრიის ნაწილი“ გახდებოდა და მას ცნობილი დღიურის კომერციალიზაციაში დაადანაშაულებდნენ.
ახლა ის იმედოვნებს, რომ მისი ნახატები ხელს შეუწყობს საზოგადოებას, აქტიურად განიხილონ იმ ადამიანების პრობლემები, რომლებმაც იძულებით დატოვეს საკუთარი სახლები ომის დროს.
ანა ფრანკის გრაფიკული დღიური ნიდერლანდებსა და გერმანიაში გამოქვეყნდა. ბრიტანეთში მისი გაყიდვა 2018 წლის დასაწყისიდან იგეგმება. ფილმი კი 2019 წელს გამოვა ეკრანებზე.
|
