კატეგორია: გენდერული პოლიტიკა 
2017-11-21
თერჯოლის მუნიციპალიტეტში მეოთხე მოწვევის საკრებულოს პირველი სხდომა გაიმართა.
სხდომაზე, „ქართული ოცნება-დემოკრატიული საქართველო“-ს წარდგინებით, საკრებულოს თავმჯდომარედ პროპორციული სიის პირველი ნომერი, ნინო ჯანელიძე დასახელდა და ფარული კენჭისყრით აირჩიეს.
„მინდა უღრმესი მადლობა გადაგიხადოთ კოლეგებო, ასევე მინდა მადლობა გადავუხადო ამომრჩეველს გამოცხადებული ნდობისათვის. ჩვენ გვექნება ახლო და მუდმივი კომუნიკაცია მათთან და არ განვიხილავთ მხოლოდ ამომრჩევლის განზომილებით, რომელიც ოთხ წელიწადში ერთხელ ახსენდებათ ხოლმე. მივესალმები, ჩვენს ოპოზიციონერ კოლეგებს, მათთან გვექნება კონსტრუქციული და კორექტული ურთიერთობა. ჩვენს მიერ მიღებული გადაწყვეტილებები იქნება ღია და საჯარო. ჩვენ დავამკვიდრებთ ურთიერთობის და საქმის კეთების ახალ სტანდარტს. აქვე, მადლობა მინდა გადავუხადო მესამე მოწვევის საკრებულოს გაწეული მუშაობისა და თანამშრომლობისათვის“- განაცხადა ნინო ჯანელიძემ.
საკრებულოს ახლადარჩეულმა თავმჯდომარემ, მოადგილის კანდიდატურად ნოდარ ფანჩულიძე დაასახელა, წარმოდგენილი კანდიდატურა, ფარული კენჭისყრის საფუძველზე ხმათა უმრავლესობით იქნა მხარდაჭერილი.
2017 წლის 21 ოქტომბრის ადგილობრივი თვითმმართველობის არჩევნების შედეგების თანახმად, თერჯოლის მუნიციპალიტეტის 35-წევრიან საკრებულოში 29 „ქართული ოცნება-დემოკრატიული საქართველოს“, 4- „ევროპული საქართველოს“, 1- „ერთიანი ნაციონალური მოძრაობის“ , 1- „პატრიოტთა ალიანსის“ წარმომადგენელი იქნება.
2017 წლის არჩევნების შედეგად საკრებულოს დეპუტატი მხოლოდ 277 ქალი გახდა. 2017 წლის თვითმართველობის არჩევნების წინასწარი შედეგების გენდერული ანალიზი „ჟურნალისტთა ქსელმა გენდერული თანასწორობისათვის“ მოამზადა.
|
