კატეგორია: გენდერი კავკასიაში 
2017-11-29
თბილისში გაიმართა რიგით მეხუთე კატო მიქელაძის სახელობის პრემიით დაჯილდოების ცერემონიალი.
2017 წელს პრემიის ლაურეატი გახდა ორაგანიზაცია "ქალები რეგიონის განვითარებისათვის" დამფუძნებელი, ქეთევან ხიდაშელი.
2008 წელს ქეთევან ხიდაშელმა სოფელ დვაბზუში შექმნა საინიციატივო ჯგუფი „დვაბზუს ქალთა ცენტრი“, ხოლო 2010 წლიდან დააფუძნა ორგანიზაცია „ქალები რეგიონის განვითარებისთვის“.
ქეთევანი აქტიურად ცდილობს ადგილობრივ თვითმმართველობაში დაიცვას მოწყვლადი ჯგუფების ინტერესები და მიაწვდინოს მათ ქალების ხმა. სხვადასხვა გზით ეხმარება ოჯახში ძალადობის მსხვერპლებს.
წელს პრემიაზე 15 ნომინანტი იყო წარდგენილი. ქალთა ფონდმა საქართველოში გადაწყვიტა დაჯილდოების ფორმატი მცირედით შეეცვალა და მხოლოდ ის აქტივისტები განიხილა, რომლებიც რეგიონებში ცხოვრობენ და საქმიანობენ. ამ გზით ფონდი მათი საქმიანობის უფრო მეტად წარმოჩენას ისახავდა მიზნად.
2016 წელს პრემიის ლაურეატი გახდა სახალხო დამცველის მოადგილე ეკატერინე სხილაძე. მან პრემიის თანხა ყვარლის მუნიციპალიტეტის სამ სოფელში სამკითხველოს გახსნას მოახმარა, რომლის მოწყობაც თითქმის დასრულებულია და ღონისძიებაზე დამსწრეებს საშუალება ჰქონდათ ენახა სოფელ თივის საჯარო სკოლაში გახსნილი ბიბლიოთეკის პირველი ფოტოები.
კატო მიქელაძის სახელობის პრემია ქალთა ფონდმა საქართველოში 2013 წელს დააწესა და ყოველწლიურად, 29 ნოემბერს, ქალთა უფლებების დამცველთა საერთაშორისო დღეს გადასცემს ქალთა უფლებების დამცველ ერთ აქტივისტს საქართველოში.
|
