კატეგორია: გენდერი კავკასიაში 2017-12-12
თბილისში იმართება მაღალი დონის კონფერენცია ქალთა პოლიტიკური მონაწილეობის საკითხებზე „საქართველო - თანაბარი მონაწილეობის მისაღწევად“.
კონფერენციის მუშაობაში იღებენ მონაწილეობას საქართველოს პარლამენტის თავმჯდომარე ირაკლი კობახიძე, პარლამენტის თავმჯდომარის პირველი მოადგილე და გენდერული თანასწორობის საბჭოს თავმჯდომარე თამარ ჩუგოშვილი, საქართველოს ვიცეპრემიერი და საგარეო საქმეთა მინისტრი მიხეილ ჯანელიძე, თბილისის მერი კახა კალაძე, ამერიკის შეერთებული შტატების ელჩი საქართველოში იან კელი, შვედეთის ელჩი საქართველოში მარტინა ქვიქი და გაეროს განვითარების პროგრამის (UNDP) მოქმედი ხელმძღვანელი საქართველოში შომბი შარპი.
თამარ ჩუგოშვილმა გახსნა მსჯელობა ქალთა პოლიტიკური მონაწილეობის საკანონმდებლო და ფინანსურ ასპექტებზე. კონფერენციის დღის წესრიგში ასევე იქნება წამახალისებელი მექანიზმების და სავალდებულო გენდერული კვოტირების, როგორც ქალთა პოლიტიკური მონაწილეობის წახალისების მექანიზმის, მსოფლიო პრაქტიკის განხილვა.
კონფერენციაში მონაწილეობას იღებენ პოლიტიკოსები, საქართველოს პარლამენტის წევრები, ცენტრალური და ადგილობრივი ხელისუფლების, სამოქალაქო საზოგადოების, დიპლომატიური მისიებისა და საერთაშორისო ორგანიზაციების წარმომადგენლები.
კონფერენციის ინიციატორია საქართველოს პარლამენტის გენდერული თანასწორობის საბჭო, გაეროს განვითარების პროგრამისა (UNDP) და შვედეთის მთავრობის ხელშეწყობით.
|