7 წლის გოგონას ზეინაბ ანსარის გაუპატიურებასა და მკვლელობაში ბრალდებულს პაკისტანელ კაცს ორი სასიკვდილო განაჩენი გამოუტანეს. სასამართლომ გადაწყვეტილება 17 თებერვალს მიიღო.
სასამართლო პროცესი 4 დღის განმავლობაში გრძელდებოდა. დნმ-ს შემოწმების შემდეგ, 24 წლის იმრან ალი სასამართლომ დამნაშავედ სცნო. მას ბრალი ედებოდა გატაცებაში, მკვლელობაში, გაუპატიურებასა და გარყვნილებაში.
7 წლის გოგოს მკვლელობამ ქვეყნის მასშტაბით მოსახლეობის საპროტესტო აქციები გამოიწვია. საზოგადოება დანაშაულის ერთ-ერთ მიზეზად პოლიციის არაკომპეტენტურობას ასახელებდა. აქციისას 2 ადამიანი დაიღუპა.
პოლიციის განცხადებით, ზაინაბის მკვლელი სხვა ადგილობრივი გოგოების გაუპატიურებასა და მკვლელობაშიც იყო ბრალდებული. მის მიერ ჩადენილი დანაშაულებები დაახლოებით 1 წელს გრძელდებოდა. მოსახლეობა მიიჩნევდა, რომ სწრაფი და ეფექტიანი მუშაობის შემთხვევაში, პოლიცია მის გამოაშკარავებას უფრო ადრე შეძლებდა.
კასურში ბოლო ორი წლის განმავლობაში უამრავი არასრულწლოვანი გოგო გაიტაცეს, გააუპატიურეს და მოკლეს. მშობლები ამბობდნენ, რომ შვილების სახლიდან გაშვების ეშინოდათ.
4 იანვარს, ზაინაბის მშობლები საუდის არაბეთში სალოცავად იყვნენ წასულები, თავად ზაინაბი კი გაკვეთილზე დასასწრებად მიდიოდა, როდესაც ის გაიტაცეს. მისმა ბიძამ გოგოს დაკარგვის შესახებ პოლიციაში მომდევნო დღეს განაცხადა.
გატაცებიდან 5 დღის შემდეგ, ზაინაბ ანსარის გვამი პოლიციამ კასურში, მის სახლთან ახლოს არსებულ ნაგავსაყრელზე აღმოაჩინა.
იმრან ალი ზაინაბის მეზობლად ცხოვრობდა. პოლიციამ ის 23 იანვარს დააკავა.
