თურქეთის პრეზიდენტი რეჯეპ ტაიპ ერდოღანი სკანდალის ცენტრში აღმოჩნდა. პრეზიდენტმა, მისი პარტიის „სამართლიანობა და განვითარების“ კონფერენციაზე, რომელიც ქალაქ კრახრამანმარაშში ჩატარდა, 6 წლის კადეტი გოგონა ტირილამდე მიიყვანა.
კონფერენციის ვიდეო თურქეთის გაზეთის Türkiye Gazetesi–ის მიერ იყო გამოქვეყნებული.
კონფერენციაზე სიტყვის გამოსვლის დროს, ერდოღანმა ექვსი წლის გოგონა შენიშნა, რომელიც სამხედრო ფორმაში იყო ჩაცმული. გოგონამ ტირილი დაიწყო, რადგან პრეზიდენტის ყურადღება მიიპყრო.
"ნახეთ ვინ არის აქ? გოგონა, რას აკეთებ აქ? ჩვენთან შინდისფერი ბერეტები არიან, მაგრამ ისინი ხომ არასდროს ტირიან! "- წამოიძახა ერდოღანმა.
შინდისფერ ბერეტებში, ერდოღანმა თურქული სპეცსამსახურების ჯარისკაცები იგულისხმა.
ვიდეოზე ნათლად ჩანს, რომ გოგონას თვალები ცრემლებით აევსო.
"მას თურქეთის დროშა აქვს ჯიბეში ... თუ ის დაიღუპება, მას, ღვთის ნებით, პატივი ექნება ამ დროშით დაკრძალონ", - განაცხადა თურქეთის პრეზიდენტმა. შემდეგ, ერდოღანმა გოგონა სცენაზე მიიწვია და ჰკითხა– მზად არის თუ არა მისი ქვეყნისთვის ყველაფერი გაიღოს. გოგონა დაეთანხმა, რის შემდეგაც ერდოღანმა მას ლოყაზე აკოცა.
სოციალურ ქსელებში გმობენ ერდოღანის საქციელს და აცხადებენ, რომ ეს დამოკიდებულება ბავშვების მიმართ მიუღებელია. უმრავლესობის აზრით, პრეზიდენტმა პატარა გოგონა პროპაგანდისთვის გამოიყენა. ბევრმა ინტერნეტ მომხმარებელმა ასევე აღნიშნა, რომ ერდოღანის შვილები საერთოდ არ მსახურობდნენ ჯარში.