ბრიუსელის სააპელაციო სასამართლომ ახალგაზრდა მამაკაცს, რომელმაც ქალ პოლიციელს გენდერული ნიშნით შეურაცხჰყოფა მიაყენა, 3 ათასი ევრო ჯარიმა დააკისრა. როგორც სასამართლოში განმარტავენ, ასეთი განაჩენის გამოტანა პირველად მოხდა.
ბელგიაში კანონი სექსიზმის დაუშვებლობის შესახებ ძალაში ოთხი წლის წინ შევიდა. ის ითვალისწინებს ჯარიმას 500 ევროს ოდენობით.
ჯარიმის ოდენობა გაიზარდა, რადგან დამნაშავემ ჩაიდინა დანაშაული საჯარო ადგილას და პოლიციელის წინააღმდეგ, რომელიც თავის მოვალეობას ასრულებდა.
პოლიციელმა სთხოვა ახალგაზრდას წარმოედგინა პირადობა, რის შემდეგ უკმაყოფილო მამაკაცმა პოლიციელს შესთავაზა "ქალისთვის უფრო შესაფერისი სამუშაო ენახა".
ჯარიმის გადაუხდელობის შემთხვევაში, ახალგაზრდას ერთი თვით პატიმრობა ემუქრება.
