საფრანგეთის მთავრობა გეგმავს კანონმდებლობაში ცვლილების შეტანას, რომლის მიხედვითაც 15 წლამდე ასაკის ბავშვებთან სქესობრივი კავშირის დამყარება გაუპატიურებათ ჩაითვლება.
საფრანგეთის თანასწორობის საკითხებში სახელმწიფო მდივანი მარლენ შიაპას განცხადებით, მთავრობამ განიხილა იმ ასაკის ზღვარი, რომლის ქვევითაც სქესობრივი კავშირი ავტომატურად სერიოზულ დანაშაულად ჩაითვლება.
მოქმედი კანონმდებლობის თანახმად, თუ არ არის დადასტურებული სქესობრივი კავშირის დამყარების იძულება და სასამართლოში თავდამსხმელის ბრალი ვერ დამტკიცდა, ეს ქმედება შეიძლება ჩაითვალოს მხოლოდ პედოფილიის შემთხვევათ, რომელიც ისჯება ხუთი წლით თავისუფლების აღკვეთით და ჯარიმით 75 ათასი ევროს ოდენობით. ამავდროულად, 15 წლამდე ასაკის ბავშვის გაუპატიურებისთვის სასჯელის სახედ დაწესებულია 20 წლის ვადით თავისუფლების აღკვეთა.
სქესობრივი კავშირის თანხმობის ასაკობრივ ზღვარს მთავრობა მომავალ კვირას დაამტკიცებს. კანონპროექტი დიდი კამპანიის ნაწილია, რომელიც სექსუალური ძალადობისა და შევიწროვების წინააღმდეგ არის მიმართული საფრანგეთში.
კანონპროექტის შემუშავება საზოგადოების უნდობლობის და პროტესტის ფონზე მიმდინარეობდა.
აქტივისტებმა პარიზის ცენტრში საპროტესტო აქციაც კი გამართეს და აცხადებდნენ, რომ "სექსუალური თანხმობის" ასაკი 15 წლით უნდა განისაზღვროს.
ბრიტანეთში სექსუალური თანხმობის ასაკი 16 წელია, მაგრამ 13 წლამდე ბავშვები დამატებითი სამართლებრივი დაცვით სარგებლობენ, რომლის მიხედვით მათ არ შეუძლიათ განაცხადონ თანხმობა სექსუალურ აქტივობაზე.
სხვა ევროპულ ქვეყნებში, როგორიცაა გერმანია და პორტუგალია, სექსუალური თანხმობის ასაკი 14 წელია. აშშ-ში კი სექსუალური თანხმობის ასაკი 16-დან 18 წლამდე მერყეობს.
საქართველოს სისხლის სამართლის კოდექსი სისხლის სამართლებრივ პასუხისმგებლობას აწესებს 15 და 16 წლამდე ან უფრო მცირე ასაკის არასრულწლოვანთან სქესობრივ ურთიერთობაზე (137–ე, 138–ე მუხლები), როგორც ძალადობით, მოტყუებით, ან წინასწარ შეცნობით (140-ე მუხლი); ასევე ნებაყოფლობითაც (141-ე მუხლი). ამით, სექსუალური ურთიერთობის თავისუფლება, გარკვეულ ფარგლებშია მოქცეული.